O sábado, pechando a xornada de Clausura das Escolas Deportivas, tiveron lugar os partidos da fase final da Copa de Fútbol Sala dos concellos de Santa Comba e Negreira.

Enfrontábanse polo terceiro e cuarto posto os equipos de Autoescola Antonio e a Autoescola Alvespa, o partido rematou nun empate a tres, e a quenda de penaltis decidiu que o equipo negreirés, Autoescola Antonio, se quedase co terceiro posto.

Acto seguido, tivo lugar a gran final, entre os equipos de Covas FT e Autoescola Mata, unha final rifada que acabou cun empate a catro tantos. De novo, foi a quenda de penaltis a que decidiu ao vencedor. Nesta, impúxose o negreirés equipo de Covas FT ante o maior atino baixo paos do seu porteiro.

A entrega dos trofeos realizárona o alcalde de Negreira, Jorge Tuñas Caamaño e a técnica de Deportes de Santa Comba, Elisa Capelo.

A programación da Primavera Deportiva e Cultural do Concello de Negreira achega este venres 17 de maio, festividade das Letras Galegas, o espectáculo Raigame, a cargo da Agrupación de Folclóre Galego Ximiela, de Louro (Muros). A cita é a partir das 21:00 horas no Auditorio do Centro Sociocultural e as entradas pódense retirar en venda anticipada por 3 euros na Delegación de Cultura, en horario de mañás.

Raigame é un espectáculo de 2 horas de duración, no que participan 64 músicos e bailaríns, ademais de dous actores e catro técnicos. Está baseado nunha das historias que marcou a Galicia nos dous últimos séculos, a emigración. A montaxe divídese nun total de 15 actos, cada un co seu correspondente vestiario, que tratan de mergullar ao espectador nunha historia contada en primeira persoa e que marcou a Galicia nos dous últimos séculos, a emigración.

Cada un dos seus quince actos conta co seu correspondente atrezzo, e sumerxen aos espectadores nunha historia contada de primeira man, na que a emoción e a veracidade coa que os actores a representan, fan que máis dunha vágoa se vise no teatro. Recollen o sufrimento dos máis de un millón de galegos e galegas, e todas as súas familias, que sufriron, e sofren, a soidade da emigración.

A Corporación Municipal de Negreira aprobou os orzamentos municipais para o exercicio 2019 na última sesión ordinaria do pleno celebrada este luns 13 de maio. Fíxoo cos seis votos dos concelleiros do equipo de goberno do PSOE e mailo voto de calidade do alcalde, desfacendo o empate tras dúas votacións, logo do voto en contra dos cinco concelleiros do Partido Popular e mailo da concelleira de Ciudadanos, e coa ausencia do edil non adscrito, José Manuel López Lago.

Os orzamentos xerais do Concello de Negreira ascenden a 5.040.718,35 euros, tanto no capítulo de ingresos como no de gastos. No primeiro capítulo, o Concello prevé un total de ingresos correntes de 4.693.747 euros e de 346.970 euros de ingresos de capital. As maiores partidas de ingresos corresponden a transferencias correntes (2.412.197); impostos directos (1.628.500), e taxas, prezos públicos e outros ingresos por 614.090 euros.

No capítulo de gastos resérvase para gastos correntes a cantidade de 4.552.347 euros, dos que a maior cuantía é para persoal (2.258.000); gastos correntes e servizos (2.000.908), e investimentos reais con 339.825 euros.

Tanto o Partido Popular como Ciudadanos expresaron o seu rexeitamento aos orzamentos no seu desacordo por ter sido levados a pleno faltando tan pouco para rematar a lexislatura. O PP criticou o feito de que coa previsión de máis ingresos por impostos directos, baixen un 10% os investimentos reais. Ciudadanos mostrou a súa disconformidade por non terse abordado no pleno municipal o gasto do Fondo de Cohesión Social e porque rómpense a estabilidade orzamentaria.

A Corporación Municipal tamén aprobou, por unanimidade, a adhesión do Concello de Negreira, á Asociación ¨Los pueblos más bonitos de España¨, quen propuso incorporar ao núcleo de A Ponte Maceira, a súa listaxe de pobos con esta distinción.

O Concello de Negreira presentou hoxe un avance dos artistas confirmados para os concertos do Verán Cultural como son: Roi Casal; Sés; Xabier Díaz e Adufeiras de Salitre, e as pandereteiras de Leilía.

O primeiro en actuar será o músico Roi Casal, co seu espectáculo ¨Son galego, son cubano¨, o sábado 13 de xullo, dentro do programa das festas de San Cristovo. Seguiralle unha das artistas máis seguidas do panorama galego como é a cantante coruñesa María Xosé Silvar, Sés, quen actuará coa súa banda en Negreira o venres 19 de xullo pola noite, sendo cabeza de cartel do festival Nicrarock.

E na Noite Folk repite Xabier Díaz e Adufeiras de Salitre, quenes actuarán o sábado 17 de agosto no Refuxio de Covas, xunto coa actuación das pandereteiras Leilía, quenes regresan ao festival folk no que xa actuaron hai uns anos.

A delegación de Cultura e Deportes do Concello de Negreira programou un roteiro de sendeirismo o domingo día 23 de xuño, de aproximadamente uns 16 quilómetros de percorrido circular cun nivel de dificultade media.

Esta primitiva ruta de peregrinación, comeza próxima a Vilar de Ordoeste, en Liñaio, cara á Ermita de San Xoán do Carballoso en Forniños, en Xallas. A ruta atravesa unha antiga ponte Romana sobre o río Corzán, restaurado pola asociación de veciños da contorna.

A saída en autobús, dende o campo da feira de Negreira, será ás 09:00 horas. Nesta actividade será preciso que cada participante leve a súa comida e bebida para a ruta. A volta está programada para ás 18:00 horas, tamén en autobús.

Inscricións: no 981 885 886 ou en Cultura e Deportes.

Dentro dos actos conmemorativos das Letras Galegas 2019, este mércores 15 de maio, o Concello fixo entrega dos premios tralo fallo do xurado dos XIV Certames de pintura ¨Negreira en cor”, e ¨Cóntame un conto¨, nun acto desenvolvido no Auditorio do Centro Sociocultural, ademáis foron os actos de clausura e entrega de diplomas aos participantes na Escola Municipal de Pandereita

Gañadores certame de contos

1º premio - Lara López Suárez co seu relato Atada por Amor.

2º premio - A clase de 5ºB do CEIP O Coto co seu relato conxunto: ¨De súpeto¨.

3º premio - Andrea Losada Noya co seu conto: ¨As costureiras de Mondoñedo¨.

Gañadores do certame de pintura

Este certame dividiuse en dúas categorías cun corte na idade dos participantes. A primeira categoría, os nenos e nenas participantes de entre seis e doce anos, repartironse os premios da seguinte maneira:

1º premio - Ayla Amigo Agra coa obra: ¨La puerta del arte¨.

2º premio - Celia Lista Vieito coa súa obra: Qué ola!.

3º premio - Lidia Núñez Forján coa súa obra: Primavera.

A segunda categoría, para mozos de entre trece e dazaoito anos, decidiuse da seguinte maneira:

1º premio - Paola Enjo Lueiro ca sua obra: (Sen título).

2º premio - María Lista Vieito ca súa obra: Vaia Pelos!.

3º premio - Julián Rey Temes e a súa obra: “Amigos Rosas”.

O Concello de Negreira encargou unha análise das augas que verte a Fonte de Vilachán, a máis usada polos veciños e veciñas da vila e arredores, de cara a coñecer se os seus parámetros son os adecuados para o consumo das persoas.

A análise realizada o pasado día 30 de abril confirmou os niveis de saubridade suficientes, e o Concello anuncia que, tras ver os resultados favorables do informe, a auga da Fonte de Vilachán é apta para o consumo.

Durante o concerto das Letras Galegas ofrecido pola Banda de Música Ateneo de Negreira en colaboración coa escola de pandereteiras e maila murga do Obradoiro de Música Tradicional (OMT) Ultreia, de Compostela, o pasado sábado 18 de maio, presentouse o documental sobre a conmemoración dos 20 anos de existencia da Banda Ateneo, que repasa como foron os comezos da xoven banda, co testemuño dalgúns dos seus directores como o primeiro e fundador, Vicente Martín; ou Fernando Rey, profesor de trompeta no Conservatorio de Música de Santiago, así como Simón Couceiro, clarinete-requinto na Banda Municipal de Santiago que tamén pasou pola Banda Ateneo, ata chegar ao actual director, Raúl Martín Niñerola.

Aquí podedes ver o documental con producción, dirección, gravación e montaxe, a cargo do equipo de Teen Records.

Documental da Banda Ateneo

O sábado 18 de maio, o Polideportivo Pedra Mámoa acolleu a sétima edición da Copa Akai, organizada por Ainhoa Rodríguez en colaboración co Concello de Negreira xunto á Federación Galega de Karate. Un evento no que se deron cita 500 deportistas de 31 clubs de Asturias, Cantabria, Madrid, Andalucía, Castela e León, A Rioxa, Galicia e Portugal, xunto á Selección Española e a Selección Galega.

A Selección Española formada por 8 deportistas Campións de España, e capitaneada polos seleccionadores nacionais Jonatan Hortas e Eduardo Flores, obtivo un total de 7 ouros, unha prata e un bronce. O total de ouros conseguidos pola Selección Española no campionato, fíxolles gañadores da Copa Akai Ryu, un trofeo que se lle outorga ano tras ano ao club ou selección que consiga máis ouros na competición.

O Club Waseda de Asturias conseguiu 5 ouros, seguidos polo Shihan (de Galicia) e o Ximnasio Areas (de Asturias), por tres.

Os resultados dos integrantes da selección española foron: Alejandra Gómez (ouro en Kata Infantil feminino), Elisey Yagudin (ouro en Kata Infantil Masculino), Iván Martín e Mario Parra (ouro e prata en Kata Xuvenil Masculino respectivamente), *Álex Morais (ouro en Kumite Infantil +45kg), Iván Montenegro (ouro en Kumite Xuvenil -54kg), Oihane Apelllaniz (ouro en Kumite Xuvenil feminino -42kg), Natalia Alonso ( Kumite Xuvenil feminino +52kg), Eva Otero (bronce en Kumite Xuvenil -52kg).

A Selección Galega, que participaba cun total de seis deportistas, obtivo 3 preseas con: Nicolás Carnota (prata en Kumite Infantil), Samuel Fontenlos (bronce en Kata Infantil) e Antón Souto (bronce en Kata Xuvenil).

Os anfitrións, deportistas do Akai Ryu, conseguiron os seguintes resultados:

Nicolás Carnota (competindo coa Selección Galega), logrou a prata en Kumite Infantil Masculino +45kg, tras perder a final por un axustado 1-0 contra o competidor da Selección Española. 

Nerea García, tamén se fixo coa prata en Kata Benjamin Feminino.

Ronsel Osorio, conseguiu a prata en Kumite Infantil -42kg.

Pola súa banda, Daniela Barbazán, alzouse co Bronce en Kata Alevin Feminino, igual que Aitana Pérez, que obtivo o bronce en Kata Alevin Feminino.
Aya Fathallah, obtivo o bronce en Kumite Junior +53kg, mentres que Markel Villaverde, Gabriel Furelos e Lle Zhou, perderon o bronce nas súas respectivas categorías, conseguindo finalmente quintos postos.

Infórmase á veciñanza que con motivo da celebración este sábado 25 de maio, do 4º Triatlón Solidario do Concello de Negreira, procederase á reubicación tanto da parada de autobuses de liña como da parada de taxis, en horario de tarde.

A parada de autobuses de liña trasládase á avenida das Brañas, diante de Breogán Deportes. A parada de taxis situarase na rúa Rosalía de Castro.