Dirixido a familias con menores de 3 anos (escolarizados) a 12 anos, o Campamento Urbano Respira que se levará a cabo durante os meses de xullo e agosto, en horario de mañá, abre a súa inscrición con prazas limitadas.

Para a adxudicación das prazas terase en conta a orde dos seguintes criterios recollidos no Regulamento do Campamento Urbano Respira (BOP 7 de maio de 2021):

1º . Familias con menores empadroados no concello de Negreira
2º. Familias que aporten informe social que indique a necesidade do servizo en base a circunstancias socioeconómicas e familiares.
3º. Familias numerosas
4º . Familias monoparentais
5º. Familias con fillas/os de mulleres vítimas de violencia de xénero
6º. Familias nas que algún das/os proxenitores teñen o eu posto de traballo no concello de Negreira

O campamento abarca desde o 1 de xullo ao 31 de agosto, podendo as familias elixir as quendas que necesiten, quedando distribuídas da seguinte maneira co seu correspondente prezo público recollido na ordenanza (BOP 19 de maio de 2021):

1ª quenda: 1 ao 15 de xullo
2ª quenda: 16 ao 31 de xullo
3ª quenda: 1 ao 15 de agosto
4ª quenda: 16 ao 31 de agosto

Prezo público

-80€/mes
-40€/quincena
-5€/día

O horario do campamento será de 8:30 a 14:30 horas. Exención e bonificación.

Segundo as circunstancias da unidade familiar aplicaranse os seguintes descontos:

1.- Exención: A emisión dun Informe Social do departamento de servizos sociais que indique a necesidade do servizo sen que haxa posibilidades económicas para abonar o custo do mesmo conlevará a exención da cota.

2.- Reducción por irmáns: Cando asistan ao mesmo servizo varios irmáns de xeito simultáneo, o segundo irmán e sucesivos terán un desconto dun 50%.

Documentación a aportar:

- Modelo normalizado de ficha de inscrición.
- DNI dos responsables do menor.
- Libro de Familia, sentenza ou resolución administrativa que acredite a relación xurídica entre ambos.

- Tarxeta sanitaria do/a menor.
- Declaración IRPF e no caso de non presentala certificación negativa.

- Xustificante bancario de ingreso do prezo público.

O persoal técnico responsable do servizo poderá requerir outra documentación complementaria ou adicional que se precise.

O desenvolvemento do campamento estará suxeito en todo momento á evolución da situación epidemiolóxica por mor do COVID-19.

As solicitudes poden presentarse no Rexistro Xeral do Concello de Negreira, na rúa do Carme, 3 baixo. Pode solicitar máis información no Centro de Información ás Mulleres de Negreira (C.I.M), solicitando cita previa no número de teléfono 981 886320/662 370 448, en horario de 9:00 h a 14:00 h de luns a venres, dende o 28 de maio ao 7 de xuño.

Dependente do Ministerio de Asuntos Económicos e Transformación Dixital, a Plataforma de Intermediación de Datos constitúe o leito natural de intercambio de datos entre as Administracións Públicas, que debe servir para liberar aos cidadáns de trámites administrativos innecesarios.

Atoparás nos adxuntos a esta información un documento sobre como acceder á información dispoñible de prestacións que constan no Rexistro de Prestacións Sociais Públicas, así como dos subsidios de incapacidade temporal, nacemento e coidado de menor.

Así mesmo, o Instituto Nacional da Seguridade Social (NSS), ofrece outros servizos que poden axilizar os trámites dos Gobernos Locais, poñendo en coñecemento dos cidadáns o modo de obter certificados de prestacións ou unha certificación negativa de pensionistas, sen saír de casa, vía SMS ou accedendo á seguinte dirección na Sede electrónica da Seguridade Social.

Os Premios Youtubeiras, organizados polos servizos de normalización lingüística de dez concellos, entre eles e dende esta edición, o Concello de Negreira; das tres universidades e da Deputación da Coruña, lanzan a súa quinta edición cos obxectivos de fomentar a creación e mantemento de canles en Youtube, así como de afondar na formación técnica para as persoas creadoras de contidos en lingua galega na Rede. Baixo o lema Magnetismo en liña, a iniciativa volverá repartir un total de 7.500 euros en premios nas doce categorías nas que se divide o certame. O concurso estará aberto a todas as persoas maiores de 14 anos con canles de Youtube en galego, autoproducidas e que teñan polo menos cinco vídeos publicados con data posterior ao 23 de outubro de 2020. O prazo de inscrición abrirase o 10 de setembro e as bases deste ano pódense consultar xa na web: www.youtubeiras.gal.

Os Premios Youtubeiras, que teñen como finalidade ser acicate da creación en Youtube con temáticas e formatos diversos, así como promover e visibilizar as/os youtubeiras/os en galego, ofrecerán unha serie de sesións formativas para procurar a mellora da calidade técnica dos vídeos por unha banda e, pola outra, para dotar as persoas creadoras de ferramentas globais para a súa actividade. Deste xeito, a formación será nesta quinta edición máis especializada que en anos anteriores.

O primeiro dos cursos en liña chegará o vindeiro 18 de xuño e correrá a cargo de Xoán Escudero, técnico de son e realizador audiovisual, que compartirá co alumnado diferentes mecanismos para perfeccionar a técnica sonora e as gravacións dos vídeos no Youtube. Ademais, ao longo do ano realizaranse outras sesións nas que se abordarán cuestións de diferente índole, como son os aspectos legais e os dereitos de propiedade intelectual ou de posicionamento da creación dixital nesta rede. A inscrición para a sesión de Son e Youtube, xa está aberta a través do formulario que se atopa na web www.youtubeiras.gal. Os cursos terán as prazas limitadas e impartiranse de forma telemática para adaptarse á situación sanitaria.

Primar as canles

Nesta quinta edición dos Premios Youtubeiras, a organización quere fomentar a creación e o mantemento de canles, polo que neste 2021 só se poderán presentar canles e non vídeos illados como en anos anteriores. Esa será a gran novidade nas bases destes V Premios Youtubeiras que, por segundo ano consecutivo, se dividen en 12 categorías: canle, vídeo, youtubeir@, calidade lingüística, impacto, calidade técnica, comunicación, creatividade, musical, didáctico, pioneiro e premio do público. Os tres primeiros acompañaranse cunha dotación económica de 1.000 euros, mentres que os nove restantes chegarán aos 500 euros.

Un xurado profesional escollerá as propostas premiadas, agás no caso do premio do público. Neste apartado, os/as seguidores/as serán quen propoñan os seus vídeos preferidos para concorrer neste apartado. As suxestións poderanse facer só a través do formulario habilitado na páxina web do proxecto Youtubeir@s>, cumprirán cos mesmos requirimentos das bases xerais e realizaranse antes do 22 de outubro de 2021. 

O Telecentro de Negreira acollerá o venres, día 18 de xuño, unha xornada formativa sobre a loita contra doenzas do castiñeiro coma "O chancro", ou Cryphonectria parasítica, e a "Avespa do castiñeiro", ou Drycosmus kuriphilus. O horario desta actividade formativa será 10:00 a 14:00 horas.

Esta xornada será impartida polo Centro de Desenvolvemento Agroforestal de Riós, na provincia de Ourense, coa colaboración da Consellería de Medio Rural, e maila Axencia Galega de Calidade Alimentaria.

Para participar, xa que as prazas son limitadas, hai que inscribirse no número de teléfono: 673 249 477, ou enviando un correo cos datos da ficha de inscrición que figura abaixo, ao seguinte enderezo: Esta dirección de correo electrónico está siendo protegida contra los robots de spam. Necesita tener JavaScript habilitado para poder verlo..

Adxunto encóntrase o formulario de inscripción. 

A Corporación Municipal de Negreira celebrará o luns, día 7 de xuño, ás 20:00 horas, unha sesión do Pleno, con carácter extraordinario, conforme á seguinte orde do día:

1º.- Toma de posesión da concelleira electa Teresa Duro Leis.

2º.- Toma de posesión do concelleiro electo Juan José Noya Rodríguez

3º.- Modificación da composición das Comisións Informativas Permanentes.

4º.- Modificación de representante nos Consellos Escolares Municipais.

O Concello de Negreira informa que o martes, día 15 de xuño, abrirán ó público para a tempada estival, as dúas piscinas municipais ao aire libre do Parque do Coto, prolongándose a tempada ata o día 15 de setembro.

O seu horario de apertura durante os meses de xuño e setembro será de 16:00 a 20:30 horas; e durante os meses de xullo e agosto, de 10:00 a 15:00, e de 16:00 a 20:30 horas. O prezo da entrada será de 1 euro.

Abonos

- Mensual: 10 €
- Tempada: 20 €
- Familiar: 30 €
- Familia numerosa: 40 €

Cursos de natación

Durante os meses de xullo e agosto, de luns a venres, e en horario de mañá, haberá cursos intensivos de todos os niveis dende os 2 anos, mediante o pago dunha cota de 8 euros, entregándose o xustificante do ingreso bancario e maila solicitude cuberta, na Delegación de Cultura e Deportes, na primeira pranta da Casa da Cultura (Carreira de San Mauro, 11), ou ben remitindo o impreso e mailo xustificante á seguinte dirección de enderezo electrónico: Esta dirección de correo electrónico está siendo protegida contra los robots de spam. Necesita tener JavaScript habilitado para poder verlo.

Debido á pandemia da covid-19, neste ano non estarán permitidas as cacharelas en terreos públicos. Soamente será posible facelas en terreos de titularidade privada.

As persoas interesadas en realizar unha cacharela en terreos privados deberán presentar a solicitude correspondente, con data límite o día 21 de xuño, por algunha das seguintes vías:

- Rexistro telemático, na Sede Electrónica do Concello: 

- Rexistro Xeral do Concello (horario de 8:00 a 14:00h).

 
O número máximo de persoas que se poidan reunir en grupo axustarase ao disposto na normativa vixente o día 23 de xuño de 2021 reguladora da situación de emerxencia sanitaria, así como das demáis recomendacións establecidas polas autoridades sanitarias.

A separación de cacharelas entre os edificios, fincas forestais, árbores e demáis obxectos que poidan resultar danados será coma mínimo de 20 metros. Poñerase especial coidado de non situalas debaixo de tendidos eléctricos ou telefónicos, así como que nos arredores non exista ningún local no que se almacen produtos inflamables nin vehículos.

Prohíbese a queima de pneumáticos, plásticos, espumas de poliuretano, aceites e en xeral calquera substancia que ao arder desprenda fume tóxico. En ningún caso se botarán ao lume recipentes que conteñan líquidos inflamables ou gases a presión (sprais), aínda que estean baleiros. Sobre terreos con vexetación herbacea, previo ó inicio do lume, farase unha devesa do material combustible nunha franxa de polo menos 9 metros de ancho, rodeando o perímetro.

A fogueira permanecerá vixiada polas persoas responsables ata a súa extinción, que deberá ser asegurada empapando os restos con auga, e asegurándose de que as cinzas queden totalmente apagadas. No caso de que se levante o vento, e poida dificultarse a vixilancia e extinción da fogueira, esta deberá suspenderse.

Este luns 7 de xuño ábrese o prazo para solicitar a participación nos obradoiros Diververán 2021. A inscrición pode realizarse presencialmente na Delegación de Cultura e Deportes, na primeira planta da Casa da Cultura, en horario de 9 a 14 horas, para o cal pódese descargar a ficha de inscrición que aparece ao final desta información.

Ofértanse 20 prazas en cada quenda, por orde de anotación, durante os meses de xullo e agosto polas mañás no Centro Sociocultural.

- Nados do 2016 a 2018, de 10:30 a 12:00 horas

- Nados de 2012 a 2015, de 12:00 a 13:30 horas

As familias interesadas deben anotarse antes do 29 de xuño, debendo entregar as fichas cubertas e mailo importe xusto de 16 euros por cada participante.

 A sesión de carácter extraordinario do Pleno da Corporación Municipal de Negreira celebrada este luns, día 7 de xuño, serveu para a toma de posesión dos novos concelleiros/as quenes xuraron o seu cargo como edís electos e de pleno dereito.

Teresa Duro Leis, número 8 da candidatura do PSdeG-PSOE sustitúe a María Josefa Vázquez Alende, trala súa renuncia. Pasará a formar parte da Xunta de Goberno Local como cuarta tenente de alcalde e asume as áreas de Educación e Sanidade, dentro do organigrama do Goberno Municipal, amén de ser designada como representante municipal nos Consellos Escolares.

Juan José Noya Rodríguez, número 7 da candidatura do PPdeG sustitúe a María González Gómez.

Ambos recibiron a benvida do alcalde, Manuel Ángel Leis Míguez quen desexoulles o mellor «e que traballades polos veciños, e é importante que na política haxa relevos». Pola súa banda, o portavoz do Partido Popular, Rubén Suárez, deulle a benvida «a esta batalla dialéctica, sobre todo, pero temos que pensar que o que estamos a facer aquí é en prol dos veciños, en prol do noso concello e non podemos extrapolar o debate e as discusións que podamos manter na política ao plano persoal».

Neste mes de xuño o Concello de Negreira presenta distintas actividades culturais e lúdicas para o desfrute da veciñanza, sobre todo pensando na rapazada antes do verán. Teatro, música infantil, apertura da piscina e moitas sorpresas nunha programación que vai a continuar co Verán Cultural, a partir do mes de xullo.

A primeira actividade e o Miniciclo de Teatro coa Escola de Teatro de Santa Comba o sábado 12 e a Escola de Teatro Municipal de Negreira que fará a súa estrea o venres 18 e mailo sábado 19. Ambas citas serán no Auditorio de Negreira.

Para os máis pequenos, o martes 15 e o venres 26 teñen unha cita ineludible coas actuacións de Mamá Cabra no novo auditorio ao aire libre da rúa Teresa Fabeiro (19:00h), o primeiro día, e coa Festa do Apego, na área recreativa Agra de Chans, na Baña, o día 26.

O martes 15 terá lugar a apertura da tempada das Piscinas ao aire libre do Coto que se extenderá até o 15 de setembro, e o último sábado de mes terá lugar o evento da Noite Romántica, onde os restaurantes de Negreira participantes farán menús especias e haberá actuacións musicais.

Para o domingo 27 o programa #Actívate péchase coa clausura da Escola Municipal de Baile Tradicional, coa celebración do Día da Muiñeira nunha versión reducida, a partir do mediodía na praza do Concello.