O Servizo de Patrimonio e Contratación, da Deputación da Coruña, sinalou a data do luns, día 30 de marzo, para o pago de depósitos previos e indemnizacións por rápida ocupación, en expedientes de expropiación forzosa con motivo das obras de ampliación e mellora da seguridade vial, na estrada DP 5602 de Negreira a Pontenafonso, no treito entre Liñaio e a ponte de Barbazán, segundo o disposto no artigo 49 do Regulamento de Expropiación Forzosa, de 26 de abril de 1957.

O lugar será a pranta baixa do Centro Sociocultural, en Negreira, de 16:00 a 18:00 horas, e relación de titulares permanece publicada no taboleiro de anuncios, na Casa do Concello.

A Secretaría Xeral da Igualdade, a través dunha Resolución do 6 de febreiro de 2020, establece as bases reguladoras e convoca para o ano 2020 o programa de axudas para a concesión das estadías de tempo libre para mulleres soas con responsabilidades familiares non compartidas.

Obxecto

Facilitarlles ás mulleres, preferentemente vítimas de violencia de xénero, que teñan fillas ou fillos menores e/ou menores en acollida, exclusivamente ao seu cargo, un espazo e un tempo desligado da súa situación habitual e no cal poidan intercambiar experiencias a través da convivencia nun espazo de lecer, reforzando o seu vínculo materno-filial nun ambiente de seguridade, respecto e bo trato como modelo de convivencia.

Prazas e duración

Convócanse ata un máximo de 90 prazas, cunha duración de entre 7 e 9 días, en réxime de pensión completa, e desenvolveranse preferentemente entre finais do mes de xuño e principios do mes de setembro.

Condicións económicas

Os gastos de aloxamento, en réxime de pensión completa, traslado de ida e volta desde o seu concello de residencia, equipo de monitoras/es e actividades complementarias serán gratuítos para as persoas beneficiarias, e serán por conta da Secretaría Xeral da Igualdade.

Requisitos das beneficiarias

    a. Ter fillas ou fillos menores e/ou menores en acollida, exclusivamente ao seu cargo e con idades comprendidas entre os 2 e os 12 anos.

    b. Non convivir con parella afectiva.

    c. Estar empadroada e ter residencia efectiva en calquera dos concellos da CA de Galicia. No caso das mulleres estranxeiras, tamén será necesario ter permiso de residencia e de traballo.

    d. Que a media dos os ingresos brutos mensuais da solicitante non superen o límite do importe de 1,5 veces o IPREM

    e. Non padecer ela, nin as fillas/os menores e/ou menores en acollida que a acompañen, unha enfermidade que requira illamento e/ou que impida a normal convivencia.

Para asistir ao programa, as mulleres beneficiarias irán acompañadas das súas fillas/os menores e/ou menores en acollida, exclusivamente ao seu cargo e con idades comprendidas entre os 2 e os 12 anos, ambos inclusive, na data de presentación da solicitude..

Prazo de presentación

O prazo de presentación de solicitudes remata o día 24 de marzo de 2020. 

Para maior información e presentación de solicitudes é necesario contactar cos Servizos Sociais Comunitarios do Concello de Negreira, chamando ó teléfono 981 885 381 ou ben nos teléfonos da SXI: 981 545 361 / 981 957 699 ou no enderezo electrónico da Esta dirección de correo electrónico está siendo protegida contra los robots de spam. Necesita tener JavaScript habilitado para poder verlo..

O Concello de Negreira recoñeceu este xoves 5 de marzo, o traballo da axente de economía doméstica do servizo de Extensión Agraria de Negreira, cuxo equipo foi crave para profesionalizar o rural do municipio e reivindicar o papel da muller na sociedade da época.

María del Carmen Álvarez de Ron Riopedre, coñecida como "Mita", marcou un antes e un despois na sociedade barcalesa. O seu traballo modernizou o rural e reivindicou o papel da muller neste ámbito. O  Concello de Negreira recoñece o seu traballo co Premio 8 de Marzo nun Auditorio cheo de público.

Coa participación do alcalde de Negreira, Manuel Ángel Leis Míguez; a concelleira de Servizos Sociais e Igualdade, María del Mar García Vidal, así como da Asociación de Mulleres Gandeiras Baneón, o equipo de igualdade EQUA do IES Xulián Magariños, e o grupo de pandereteiras; foi un antigo compañeiro seu como Joaquín Buergo del Río, o encargado de poñer en contexto o arduo traballo realizado naquela época dende a axencia de Extensión Agraria.

Mita, asturiana de nacemento, en concreto de Vegadeo (1945), mudouse a Negreira onde traballou como axente de economía doméstica na primeira axencia do extinto Servizo de Extensión Agraria, de toda España. Os seus fillos, María del Mar e Dan Cruz, foron os encargados de agradecer este recoñecemento á traxectoria profesional e social da súa nai.

O seu labor, xunto coa dos membros do seu equipo, contribuíu á modernización e profesionalización do rural do municipio, constituíndo unha figura crave para o progreso de leste. As súas formacións e a súa incesante capacidade de traballo introduciron novos tipos de cultivo en Negreira e reivindicaron a figura da muller no ámbito rural, e na sociedade en xeral.

Mita e o seu equipo de Extensión Agraria conseguiron modernizar unha sociedade que por aquel entón permanecía pechada a unha economía de subsistencia e á discriminación da muller. Cos seus talleres Mita deu a coñecer novos cultivos no rural do municipio, profesionalizándoo e deixando atrás o autoabastecimiento. Á súa vez, consciente de que a poboación da Galicia rural sufría de carencias alimenticias, deu a coñecer a pirámide alimenticia, co obxectivo de mellorar a nutrición dos veciños e veciñas.

Dentro das iniciativas realizadas con mulleres incluíronse viaxes e colaboracións para crear asociacións feministas como a de Mulleres Gandeiras Baneón. Á súa vez, o seu incesante labor tamén impulsou a creación de organizacións doutro tipo, como a de xubilados. Tamén creou xunto co seu marido a Asociación Cultural Tambre, constituíndo sempre unha figura destacada na organización de actividades e eventos do municipio, chegando tamén a fomentar a I Carreira Popular de Negreira, unha cita de ámbito nacional na actualidade.

A compañía de teatro Os Quinquilláns actuou coa súa obra A pluma viva de Rosalía  hoxe, 6 de marzo, de 12.30 a 13.30 horas, no Auditorio de Negreira ante o alumnado de primeiro, segundo e terceiro de ESO do IES Xulián Magariños e o alumnado de sexto de primaria do CEIP O Coto. 

A obra está centrada en Rosalía de Castro, pensada para conmemorar o Día de Rosalía que se festexa todos os anos o 24 de febreiro. Conta a visita que fixo Rosalía por sorpresa á imprenta de Soto e Freire en Lugo.

O Obradoiro de Emprego Xóvenes 2019, participado polos concellos de Val do Dubra, A Baña, Negreira e Santa Comba, sendo promotor o primeiro deles e co apoio da Xunta de Galicia; promove a vindeira semana no noso concello, unha serie de talleres baixo o título: Move o teu corpo e mente, a levarse a cabo, entre o luns 16 e mailo luns 23 de marzo, nos locais sociais de Marcelle, Bugallido, Gonte, Broño, Romarís, Barbazán, Liñaio e Portor.

A especialidade de Actividades de Animación Física, Deportiva e Recreativa (AFDA0211), organiza talleres para persoas adultas onde se procura poñer en práctica o aprendido a través da estimulación cognitiva, a diversión, o movemento e as relacións sociais.

Segundo informan, en cada lugar, acompañarase a actividade dunha pequena chocolatada para facer máis amena a xornada, e todas as persoas interesadas en participar só teñen que acudir aos locais socias que queiran, no horario que mellor lles conveña, dentro da súa dispoñibilidade.

Horarios

 Luns 16 de marzo:

- Local social de Marcelle (de 10:00 a 11:30 horas)

- Local social de Bugallido (de 12:00 a 13:30 horas)

Martes 17 de marzo:

- Local social de Gonte (de 10:00 A 11:30 horas)

- Local social de Broño (de 12:00 a 13:30 horas)

Mércores 18 de marzo:

- Local social de Romarís (de 10:00 a 11:30 horas)

- Local social de Barbazán (de 12:00 a 13:30 horas)

Luns 23 de marzo:

- Local social de Liñaio (de 10:00 a 11:30 horas)

- Local social de Portor (de 12:00 a 13:30 horas)

O equipo das Sinerxéticas, do IES Xulián Magariños, clasificouse de forma extraordinaria para a final do Club de Debate 2020 que organizan os equipos de normalización lingüística de diferentes concellos, entre eles, o de Negreira, na que foi a segunda fase de zona da presente edición, e na que participaron un total de oito equipos, celebrándose na Casa da Cultura de Outes.

Quedaron segundas, con 415 puntos, tralo equipo Canido, pertencente ao IES de Canido (Ferrol), con 438 puntos, defendendo o argumento, a favor e en contra, sobre a seguinte cuestión: «A monarquía é necesaria no século XXI?»

As Sinerxéticas, que ao igual que As Falangueiras, participan no Club de Debate co apoio do Concello de Negreira, quen sufraga os gastos de participación xunto ao resto de concellos; está formado polos seguinte alumnado: Reyes Freire; Lara Vieito; Raúl Castro; Lorena Golán; Andrea Losada; Eda Bove e Iria Sánchez, e a súa preparadora é Sara Marchena, estando acompañados por Begoña Leal, coordenadora do Servizo de Normalización do instituto, e xunto á directora do centro, Clara Rodríguez; e maila técnica de Normalización Lingüística do Agrupamento A Baña-Negreira, Carme Pereiro.

Tamén estiveron arroupando ao alumnado de Negreira, os concelleiros Iván Guardado Porto, segundo tenente de alcalde e concelleiro de Deportes, Novas Tecnoloxías e Participación Cidadá; Juan Plata Barbazán, concelleiro de Comercio, Turismo e Industria, e Adolfo Manuel Barbosa Pérez, concelleiro de Agricultura, Medio Ambiente, Parques e Xardíns.

O segundo equipo participante, As Falangueiras, non puido clasificarse entre os dous primeiros para a final. As Sinerxéticas fixéronse cos 300 euros e unha praza, ao igual que os vencedores, para a fase final, da que xa se coñece o tema a debater: O futuro do galego está en nós. Porén, aínda queda por celebrar a terceira rolda destas xornadas da que sairán outros dous participantes na final, e que enfrontará a alumnos de Santiago, Teo e Ames.

O alcalde de Negreira, Manuel Ángel Leis Míguez, informa á veciñanza do Concello de Negreira, da adopción de medidas ante a situación de urxencia que está xerando o avance do coronavirus (COVID-19).

BANDO

Ao amparo do Plan Territorial de Emerxencias da Xunta de Galicia e mailo Real Decreto de estado de alarma, dende o Servizo de Emprego de Galicia, en coordinación co Servizo Público de Emprego Estatal (SEPE), acordouse as seguintes medidas:

- Non será necesario renovar a demanda de emprego (renovación do paro), ata o día 30 de abril de 2020.

- Se o cidadán precisa facer algún trámite urxente coa súa demanda de emprego, deberao facer a través da oficina virtual ou chamando ao 012.

- As oficinas de emprego permanecerán pechadas ao público.

- Quedan suspendidas as citas presenciais de Orientación laboral.

- Quedan aprazadas, mentres dure a suspensión da actividade educativa, as accións de formación profesional para o emprego que son xestionadas ou financiadas pola Xunta, os obradoiros de emprego e os programas integrados de emprego.

Ademáis, é preciso que teñas en conta que, no que se refire ás Oficinas de Prestacións dependentes do SEPE:

- Non se terán en conta os prazos establecidos para solicitar a prestación ou subsidio. O dereito á prestación ou subsidio queda plenamente garantido sen ter que cumprir os prazos habituais para solicitalos.

- Habilitaranse canais para a recuperación da demanda de aquelas persoas inscritas con anterioridade ou para facilitar, no seu caso, a inscrición inicial.

- Non se esixirá a acreditación da búsqueda activa de emprtego na solicitude de subsidio extraordinario ou renda activa de inserción.

Fonte: Emprego Galicia (Xunta de Galicia).

Recórdase a toda a veciñanza que seguimos en estado de alarma, e que está prohibido sair á rúa, polo que debemos permanecer confinados nos nosos domicilios, porque tan só se permite abandoar a vivenda en determinados casos.

Non é necesario sair a facer a compra a diario. Pódese e débese realizar para varios días, evitando así que haxa contacto social. Si saen á rúa poden facer todo de unha vez.

Estamos constatando que hai veciños que se pasan o día na rúa facendo os recados, algo que está totalmente prohibido polo que van a ser sancionados.

A denuncia mínima é de 601 euros, cada vez que se sae á rúa sen un motivo urxente, aménd e correr un serio risco de infectarse, polo que a persoa que sae constantemente, vaise a infectar e contaxiar aos fillos, ás parellas e a outros familiares que residen no mesmo fogar.

Por ti, polos teus, por todxs: #QuedaNaCasa

Hai xente que se xoga a vida por ti: #QuedaNaCasa

Propoñémosvos, que cando rematemos con isto, que remataremos máis pronto que tarde, saiamos a celebralo, nos pequenos comercios que hoxe están pechados e angustiados, nunha campaña conxunta da Asociación de Empresarios de Negreira e mailo Concello, baixo o título de: Reciclamos e conectamos.

Saiamos a mercar nas tendas da nosa vila, compremos unhas zapatillas, uns vaqueiros, un billete de lotaría, unhas lentes, algún detalle para o noso fogar que durante moitos días foi o noso refuxio.

Vaiamos a nosa perruqueira ou barbeiro, a facernos un novo corte de pelo, ou ao centro de estética a aplicarnos un tratamento, ou unha masaxe co noso físio que xa botamos de menos.

Saiamos e levemos aos nosos fillos e fillas ao parque, a mercar un libro ou simplemente unhas chuches.

Temos que encher as rúas, os bares e restaurantes, as terrazas... que non se vexan baleiras como estes días, debemos impedir que os autónomos e as pequenas empresas desaparezan.

“Queremos celebrar que finalmente podemos saír, que podemos abrir os nosos negocios, que isto pasou e que podemos seguir adiante.”

Queremos que para cando todo isto pase, a nosa vila transmita alegría e colorido, para iso propoñémosvos ambientala e decorala, con flores, moitas flores de cores, fagamos nosas propias flores con materiais que teñamos a disposición, materiais reciclados e así, lle damos un novo uso, e se tedes nenos na casa sería unha manualidade para facer en familia.

A data exacta non a sabemos, pero temos días para irnos preparando. Animádevos e, sobre todo desfrutádeo! que nos sirva de experiencia para demostrar que xuntos podemos facer cousas grandiosas! E ademais podemos convidar aos nosos familiares e amigos que estiveron traballando durante estes días para agradecerlles o marabilloso traballo e esforzo que realizaron.

#reciclamoseconectamos

Empresarios e veciños de Negreira

Máis información:

https://www.facebook.com/AsociacionEneEmpresariosdeNegreira/