O Concello de Negreira implanta un novo servizo de comunicación de incidencias a través de App móvil, creando unha canle directa de comunicación das incidencias localizadas no noso municipio. Este servizo vai ser presentado este venres 4 de novembro, ás 11:00 horas no Telecentro de Negreira.

O usuario conéctase á web de Play Store ou a App Store en función da tecnoloxía empregada no seu dispositivo móvil (Android / iOS). Selecciona a App Línea Verde, con descarga de balde e, a partir de ese intre o procedemento é moi sinxelo.

Para comunicar unha incidencia, basta con seleccionar a tipoloxía. Por xeolocalización, a aplicación se encarga de detectar de forma automática as coordenadas exactas do lugar. Aínda así, o usuario tamén pode facelo manualmente si decide envíalo aviso noutro momento e dende outro lugar. Incluso pódese adxuntar unha foto da incidencia cunha breve descrición.

Unha vez enviada, o responsábel designado recibirá notificación da mesma. A partir dese intre, comezan os trámites para dar solución á incidencia detectada. E unha vez resolta, o cidadán recibe unha notificación no seu terminal.

Para comunicar calquera incidencia tamén se pode facer a través da web http://www.linhaverdenegreira.es/. Unha vez rexistrado, o usuario poderá poñer en coñecemento o desperfecto detectado.

Con esta implantación, o Concello de Negreira pretende ofrecer aos cidadáns e empresas da súa contorna, un servizo totalmente de balde e que serve de canle de comunicación directa para que o noso concello cumpra as normas básicas do benestar social.

A Asociación de Amas de Casa de Negreira en colaboración cos Servizos Sociais Comunitarios do Concello, promoven unha recollida solidaria de alimentos de cara ás festas do Nadal, tratando de axudar a aquelas familias que sofren máis necesidades.

Na campaña que prolongarase ata o día 9 de xaneiro acéptasen toda clase de alimentos non perecedeiros, dígase legumes, conservas, aceites, leite ou pan tostado, entre outros,  ademáis de produtos básicos para almorzos e merendas. Asemesmo, tamén inclúe a recollida de produtos de hixiene persoal e de limpeza.

Esta campaña conta coa colaboración de: Casa Lula; e os supermercados Froiz; Gadis e Eroski, lugares nos cales haberá un espazo para que quenes queiran colaborar depositen alí os seus produtos.

Para facer doazóns a esta campaña existe un número de teléfono de contacto: 659 180 323 da Asociación de Amas de Casa. Tamén nos Servizos Sociais, na pranta baixa da Casa do Concello.

Tamén en Pesadoira

Igualmente, e como outros anos, a Asociación de Mulleres de Alvite leva a cabo unha campaña de recollida de alimentos e productos de hixiene, entre o día 1 de novembro e mailo 15 de decembro.

Existen tres puntos de entrega: Casa do Panadeiro; Bar de María e o Estanco, todos eles en Pesadoira.

O DAC-Outono Cultural, o programa de espectáculos que desenvolve a Deputación da Coruña para achegar as figuras de Castelao, Irmandades da Fala e Manuel María a un público de todas as idades en 18 concellos da provincia, botou a andar onte domingo coa estrea do "Menú da Fala", de Carlos Blanco e Luís Davíla", no Auditorio de Negreira, cunha gran acollida por parte do público de tódalas idades, quenes disfrutaron dun espectáculo único, con reiterados aplausos e sen parar de rir.

Á estrea asistiu a vicepresidenta da Deputación e responsábel da área de Cultura, Goretti Sanmartín, quen estivo acompañada polo alcalde negreirés, Jorge Tuñas Caamaño e maila concelleira de Educación e Servizos Sociais, María Jesús Veiga Hortas.

O Menú da Fala, que o propio Carlos Blanco definiu coma unha homenaxe en clave de humor á nosa língua é un dos espectáculos máis ambiciosos de toda a programación e na que participan numerosos artistas de recoñecido prestixio en Galicia, como Carlos Blanco e Luís Davíla, dous piares básicos no eido do humor narrado e do humor gráfico, respeitivamente.

Nesta xira ambos crean novo material e adaptan outros xa existentes para crear un espectáculo único, amosando a súa incrible capacidade para faceren rir, adaptarse, integrar e facer humor con selo e calidade de país.

Dezaoito concellos

Esta iniciativa da área de Cultura da Deputación da Coruña que se desenvolverá en 18 concellos cabeceira de comarca nos meses de novembro e decembro para difundir as figuras e efemérides culturais que se conmemoran no ano 2016 en Galicia: Manuel María (Día das Letras Galegas), Irmandades da Fala (Centenario) e Alfonso Daniel Rodríguez, Castelao (Ano Castelao Artista).

O programa inclúe catro espectáculos escénicos de primeiro nivel que se desenvolverán tamén en Ames, Arzúa, Betanzos, Carballo, Cee, Melide, Muros, Narón, Noia, Oleiros, Ordes, Ortigueira, Padrón, As Pontes, Ribeira, Santa Comba e Vimianzo.

Segundo sinalou Goretti Sanmartín na presentación do programa, estamos ante un proxecto co obxectivo de «divulgar o legado cultural destes tres eixos da nosa cultura, de maneira especial, ás novas xeracións, con espectáculos e linguaxes contemporáneas».

A presente convocatoria ten como obxectivo a concesión dos premios do VI Concurso de relatos curtos e carteis gráficos “Loita contra a violencia de xénero ”, organizado polo Concello de Negreira a través do Centro de Información á Muller (CIM) coa intención de sensibilizar á poboación sobre esta lacra social.

BASES DE PARTICIPACIÓN:

1ª.Poderán participar tódalas persoas menores de 18 anos.                                                            

2ª.Os traballos presentados deberán ser entregados no Centro de Información á Muller no Concello de Negreira, nun sobre pechado. Deberá constar un número de teléfono de contacto e en ningún caso deberá aparecer o nome da persoa participante. A identificación da  persoa levarase a cabo mediante o uso dun pseudónimo.

3ª.O concurso constará de dúas modalidades: relato curto e cartel gráfico. A temática a que deben axustarse os traballos é a Loita contra a Violencia de Xénero en tódalas súas manifestacións: física, psicolóxica, sexual, económica, estructural… así como os efectos e consecuencias da mesma en tódalas persoas que a sofren.

4ª.Os traballos presentaranse en galego ou castelán. No caso dos relatos terán como extensión máxima 5 folios (DIN-A4).

5ª.Tódolos traballos que se presenten deberán ser orixinais, inéditos e non presentados en anteriores concursos neste ou noutro concello. De non ser así, quedarán inmediatamente excluídos do concurso.

6ª.Os criterios de valoración para elixir ós traballos premiados serán os seguintes: contido e tratamento do tema, orixinalidade, expresión e presentación en xeral.

7ª. O prazo para a presentación dos traballos é do 7 de novembro  ó 21  de novembro.

8ª.Os traballos orixinais quedarán en poder do CIM de Negreira que se reserva o dereito para a súa publicación, exposición, doazón ou calquera outro uso posterior, sempre sen ánimo de lucro.

9ª.Entre tódolos traballos recibidos un xurado independente seleccionará os gañadores de cada modalidade e concederá os seguintes agasallos :

                -Premio ó mellor relato curto: vale regalo por importe de 100 Euros a utilizar nunha tenda da vila.

                -Premio ó mellor cartel gráfico: vale regalo por importe de 100 Euros a utilizar nunha tenda da vila.

10ª. A entrega de premios levarase a cabo o vindeiro 26 de Novembro ao remate da andaina: “Negreira camiña contra a violencia de xénero ”. A organización contactará previamente cos premiados por teléfono para que asistan ó  acto de entrega a recoller o seu agasallo en persoa. De non poder facelo, designará previamente a un sustituto que o fará no seu nome.

11ª.Os traballos gañadores poderán divulgarse a través dos medios de comunicación locais.

12ª.As persoas participantes serán as únicas responsables do contido respetando as esixencias legais de dereitos, de autoría ou plaxio, segundo as leis vixentes.

13ª.Tódolos participantes están obrigados a cumprir estas bases. Calquera outra circunstancia non prevista nas mesmas, será resolta polo xurado e as súas decisións serán inapelables.

Co gallo da trixésimo sétima edición da Carreira Popular de Negreira que se celebra este domingo día 13 de novembro, desde o Concello como entidade organizadora informamos das restriccións para a circulación de vehículos, antes e durante o desenvolvemento das cinco probas que integran este importante evento deportivo de referencia en Galicia e a nivel nacional.

É moi importante destacar que a partir das 10:15 horas vaise cortar totalmente ó tráfico todo o circuito de 5 quilómetros con saída desde a rúa de Castelao cara o instituto Xulián Magariños, rúa Xosé M. López Ardeiro, avenida das Brañas, Xanín, Pedra Mámoa, Polígono Industrial, avenida de Barcala, rúa da Cachurra, rúa do Carme e rúa de Castelao (META).

Restriccións aparcamento

Prégase a residentes e veciños en xeral non estacionar nas zonas acoutadas desde o sábado 12 de novembro ó mediodía: toda a rúa do Carme; a rúa de Castelao e a prolongación desta por diante do IES Xulián Magariños ata a rúa Xosé M. López Ardeiro.

Vehículos pesados

Prégase aos donos de vehículos longos (dígase camións e autobuses), non estacionar en lugares do percorrido que obstaculicen o desenvolvemento das carreiras.

Mobilidade en coche

Prégase aos residentes non desprazarse con coche polas zonas afectadas polo percorrido, a partir das 10:00 horas da mañán do domingo 13 de novembro e ata que rematen as tres primeiras carreiras para evitar longas esperas. É recomendable que si teñen que sair co coche o fagan antes das 10:00 horas.

Percorridos

1ª Carreira Absoluta (saída ás 10:30 horas): Rúa de Castelao; IES Xulián Magariños; Xosé M. López Ardeiro; avenida das Brañas; Xanín; Pedra Mámoa; Polígono Industrial ata o Punto Limpo e retorno; avenida de Barcala; rúa da Cachurra; rúa do Carme e rúa de Castelao (META). Son 2 voltas ó circuito (10.000 metros).

2ª Carreira Infantís-Cadetes e Xuvenís (saída ás 11:50 horas): Rúa de Castelao; IES Xulián Magariños; Xosé M. López Ardeiro; avenida das Brañas; Xanín; Pedra Mámoa; Polígono Industrial  (sen ir ó Punto Limpo); avenida de Barcala; rúa da Cachurra e rúa de Castelao (META). Lonxitude: 3.800 metros.

3ª Carreira Benxamíns e Alevíns (saída ás 12:30 horas): Rúa de Castelao; IES Xulián Magariños; Xosé M. López Ardeiro; avenida das Brañas; rúa Rosalía de Castro e rúa de Castelao (META). Lonxitude: 1.000 metros.

4ª Carreira Prebenxamíns (saída ás 12:50 horas): Rúa do Carme e rúa de Castelao (META). Lonxitude: 250 metros.

5ª Carreira Chupetes (saída ás 13:00 horas): Rúa de Castelao, e rúa de Castelao (META). Lonxitude: 200 metros.

Agradecementos: Un ano máis queremos destacar de antemán a colaboración prestada polo posto da Garda Civil de Negreira, a Agrupación de Tráfico da Garda Civil de Santiago, así como a Policía Local de Negreira e, as distintas agrupacións de Protección Civil que participan no operativo especial da Carreira Popular: Negreira; Santa Comba, Val do Dubra; Porto do Son; Rois/Padrón, quenes velarán pola seguridade dos participantes durante as distintas probas.

Tamén aos voluntarios/as de clubs deportivos e outros que colaboran activamente na seguridade do evento.  

Hoxe ás 22.00 horas péchase a inscrición para participar na XXXVII Carreira Popular de Negreira, este domingo a partir das 10:30 horas coa proba absoluta de 10.000 metros sobre un circuito de 5 quilómetros ao que os atletas xunior, promesa, sénior e veteranos deberán dar dúas voltas, con saída e meta na rúa de Castelao.

Presentámosvos a camiseta técnica que levaránse todos os participantes este domingo na 37ª edición da Carreira Popular, xunto coa bolsa do corredor.

O Concello de Negreira lembra que na 3ª, 4ª e 5ª carreiras, a entrega de premios (medaias) terá lugar ao chegar á meta.

Recollida de dorsais

Pódense retirar este sábado en Negreira, de mañá e tarde. En Garport, na rúa da Cachurra 10, para os adultos e, en Breogán Deportes, na avenida das Brañas 8, para as categorías escolares. O domingo antes das probas no polideportivo do CEIP O Coto.

Bolsa corredores adultos

Camiseta técnica; barrita cereais; batido lácteo; auga; pastel e bolsa portaobxectos de poliéster.

Bolsa corredores infantís

Camiseta técnica; barrita cereais, batido lácteo; auga; pastel; chapa conmemorativa; medaia e bolsa portaobxectos de poliéster.

Avituallamentos en carreira

Puntos de auga nos quilómetros 5 e 8

Avituallamento en meta

Powered; froita e cervexa

Outros servizos

Caixóns de saída por marcas; tres globos (ou lebres) por tempos (40´-45´-50´); servizo de cronometraxe por chips; puntos quilométricos sinalizados; gardeiría e gardaroupa no polideportivo do Colexio do Coto; servizo de fisioterapia e masaxes; servizo de duchas na Piscina Climazatizada (servizo de buses), e fotografía profesional.

O keniano Titus Kipjumba Mbishei, subcampión do mundo na distancia de 10.000 metros, na categoría xúnior en 2008, e o seu compatriota Emanuel Bor, non decepcionaron nos pronósticos, nunha carreira que dominaron dende o principio, descolgándose dos outros catro corredores que formaron un grupo de seis atletas nos primeiros dous quilómetros. A partir do primeiro paso por Pedra Mámoa, os dous kenianos fóronse ata compretar as dúas voltas ao circuito.

Kipjumba e Bor cruzaron a liña de meta con só dous segundos de diferencia cun crono de 29:01 e 29:03, respeitivamente, mentres que o marroquí Hadout, finalizaba a carreira cun tempo de 30:12. Cuarto foi o portugués Nuno Filipe Ribeiro, recente vencedor na Pedestre de Santiago e afincado en Oroso.

O mellor atletas galego da xornada foi o marroquí afincado en Ourense, Hassan Lekhili, quinto con 31:21, e a continuación entrou o leonés, Iván Cánovas, con 31:59. Do sétimo ao décimo posto chegaron os corredores galegos: Luis Iglesias Raña; Iván Docampo; Rubén Caamaño e Cristián Muiño. No apartado local así quedou o pódium final: Luis Calvo; Rubén Martínez Mayo e Jorge Crespo Arias.

Tampouco houbo grandes sorpresas entre as féminas. Kaoutar Boulaid, atleta keniana proclamouse campiona cun tempo de 34:22. Nazha Machrouh e a olímpica portuguesa, Marisa Barros, compretaron o podium con tempos de 34:53 e 35:30, respeitivamente.

Joselyn Brea, venezolana afincada en Pontevedra foi cuarta e, a lusa Clarisse Cruz, quinta. A sexta praza foi para Daniela Sousa. A primeira galega foi Rocío Alvite, de Mazaricos, seguida de Raquel Suárez. No apartado local: Irma Oroña; Laura Liñares e Mercedes Freire.

Por categorías, na sénior os vencedores foron Iván Docampo e Raquel Suárez. Na categoría promesa, destacou o triunfo do corredor negreirés Youssek Kouaou, e Carla Penabaz no apartado feminino. En xúnior foi Borja Castro e, na categoría de veteranos proclamabase vencedor un atleta veciño de Negreira como e Luis Calvo Castro, xunto a Johana Torres.

Na clasificación final por equipos resultou vencedor o Atletismo Sar Vermú Petroni, seguido do Atletismo Arenteiro, e en terceiro lugar o Atletismo Milladoiro.

Máis de 1.000 atletas escolares disfrutaron de unha mañá deportiva polas rúas dunha vila ateigada de espectadores que non deixaron de animar a tódolos participantes durante a xornada marcada pola excelente climatoloxía e un gran ambiente de público en todo o circuito.

O Concello de Negreira rematou o proxecto de eficiencia enerxética na iluminación do Pabellón de Pedra Mámoa, no que se realizaron traballos de sustitución das luminarias de vapor de sodio de alta presión por unhas de alta eficiencia, co conseguinte aforro no consumo eléctrico.

A inversión total foi de 12.426.70 euros dos cales 7.857,45 foron de axuda pública.

O ciclismo galego homenaxeará este domingo cunha Marcha Cicloturista en Negreira, a Jesús Mancebo Rojo, falecido o pasado día 1 de setembro nun atropelo mortal á altura da parroquial de Brandomil, no concello de Zas, mentres practicaba a súa gran paixón, o ciclismo. 

O percorrido de 41 quilómetros (Negreira-Brandomil-Negreira), terá a súa saída ás 10:30 horas desde a Praza das Brañas, previa concentración de tódolos participantes. Leerase un manifesto a favor do respeto aos ciclistas nas estradas baixo o lema: "Non máis mortes de ciclistas. ¡Basta xa!”. Tamén está previsto que se depositen flores no lugar onde tivo lugar o tráxico atropelo. 

Ao acto de presentación que tivo lugar no Auditorio de Negreira asistía o presidente da Federación Galega de Ciclismo, Juan Carlos Muñiz, ademáis de Ezequiel Mosquera, ex ciclista profesional, xunto con Amable Suárez, presidente do Club Ciclista Negreira, e mailo alcalde negreirés, Jorge Tuñas Caamaño, nun acto presentado por Francisco Lens, secretario do club local.

Polo de agora son máis dun cento os cicloturistas inscritos, pero o prazo está aberto ata o mediodía deste venres neste enlace: Marcha Ciclo Turista Negreira 2016

Ademais, durante a marcha repartirase a cada participante un chaleco de alta visibilidade da campaña #eufagomever promovida pola Delegación do Goberno, a Conselleria de Infrastructuras, a DXT, Garda Civil de Tráfico, Secretaría Xeral para o Deporte e a propia Federación Galega de Ciclismo.

Hoxe comeza en Negreira o 29 Congreso de Enciga, a Asociación de Ensinantes de Ciencias de Galicia, polo cal suspenderanse as actividades lectivas as dúas últimas horas do xoves 17 e toda a mañá do venres 18 de novembro.

O IES Xulián Magariños acolle ata o sábado aos máis de 250 participantes no XXIX Congreso de Enciga, coordinado polos profesores do centro, Adelino Pose Reino e Francisco Rañal Loureiro, e que conta coa colaboración do Concello de Negreira.

O Congreso de Enciga vai ser inaugurado ás 19:45 horas nun acto de benvida aos máis de 250 participantes, a desenvolverse no Auditorio do Centro Sociocultural, e tralo cal terá lugar a conferencia inaugural impartida polo doutor José Benlliure Anaya, catedrático da área de Física Atómica, Molecular e Nuclear da Universidade de Santiago de Compostela baixo o título de: Dos núcleos ás estrelas e o seu impacto social.

Pódese consultar aquí todo o programa do XXIX Congreso de Enciga que este venres inclúe visitas a distintos lugares de interese da nosa área de influencia como son: O comprexo industrial de Feiraco; unha explotación gandeira de Mazaricos; Central Hidroeléctrica do Tambre; Pranta de Tratamento de Residuos de Lousame; Central Loxística do Sergas; paraxe natural de Pontemaceira; Pazo do Cotón; Paseo fluvial do Barcala e Torres de Altamira.