O Concello de Negreira promove por sexto ano consecutivo, a súa «Gala do Deporte», a celebrarse o venres día 3 de febreiro, no Auditorio do Centro Sociocultural, despois de que o pasado venres 20 de xaneiro o xurado composto polos representantes dos clubs e entidades deportivas locais outorgase de maneira consensuada, uns premios que recoñecen os méritos deportivos a veciños/as do noso concello, quenes co seu esforzo e compromiso levan o nome de Negreira por toda Galicia e tamén por España adiante.

A 6ª Gala do Deporte comezará ás 21:00 horas e, ademáis dos recoñecementos aos méritos deportivos, tamén haberá actuacións musicais e exhibicións, nunha gala cunha duración aproximada de 90 minutos.

Relación de premios:

1. Mellor deportista do ano 2016

2. Mellores deportistas promesa do 2016

3. Mellor equipo ou clube do ano 2016

4. Recoñecemento á traxectoria deportiva

5. Recoñecemento ó patrocinador, ou colaborador co deporte

6. Recoñecemento a clubes pola súa antigüidade

7. Recoñecemento especial do xurado

Para este ano 2017 a Piscina Municipal de Pedra Mámoa pon en marcha unha campaña para animar á veciñanza barcalesa a practicar máis deporte e mellorar a súa forma física. Xa durante o pasado mes de decembro, houbo xornadas de portas abertas para visitar e coñecer as instalacións e no mes de xaneiro ofertáronse novas actividades e cursos.

O Complexo Deportivo de Pedra Mámoa pretende que tódolos negreireses e visitantes poidan iniciarse na práctica deportiva ou melloren o seu nivel físico, con actividades dirixidas e natación.

Horario de inverno

De luns a venres, o horario é de 8:00 a 12:30 horas e, de 16:30 a 22:30 horas polas tardes. Os sábados, as instalacións abren ó público únicamente de mañá, de 9:00 a 12:30 horas, mentres que os domingos e festivos, permanece pechada.

As instalacións municipais dispoñen de 1.200 metros cadrados, que comprenden a piscina deportiva, a piscina de iniciación, a piscina infantil, a sauna e mailo baño turco na planta baixa. Na planta superior conta cunha sala de actividades, a sala de bike, así como unha sala de fitness e musculación.

Unha instalación deportiva en continua renovación e onde practicar máis de 60 horas de actividades dirixidas. Ademáis, conta cunha compreta oferta de cursos para os máis pequenos da casa, así como para adultos e para clubs deportivos con actividades totalmente adaptadas a eles.

Máis info en: Esta dirección de correo electrónico está siendo protegida contra los robots de spam. Necesita tener JavaScript habilitado para poder verlo. e no tlf. 981 885 675

Catro xóvenes deportistas de Negreira clasificáronse para participar na Fase Provincial de Campo a través escolar, do programa Xogade da Xunta de Galicia que terá lugar, o sábado día 18 de febreiro, na localidade de A Pobra do Caramiñal, logo de terse celebrado o pasado venres a Fase Intercomarcal no circuito do parque Horta do Muiño, na Serra de Outes.

Polo Colexio de O Coto acadaron a súa clasificación: Bilal Kouaou, oitavo na proba de Benxamín masculino e, Daniel Forján Costa, cuarto na proba de Alevín masculino.

Pola Escola Municipal de Atletismo clasificáronse en categoría Cadete femenina: Violeta Pérez Barbazán e Alba Pérez Nieto, quinta e sexta, respectivamente.

Noraboa a todos eles/as e desexámoslles o mellor para a cita coa Fase Provincial, na que tamén participará o equipo Cadete feminino do CPI San Vicente, de A Baña, integrado por Sara Lougzili, Paula Paredes segunda e terceira, respectivamente, xunto a Zaira Blanco Rial.

O Concello de Negreira, a través da Axente de Desenvolvemento Local, Sonia Ponte, informa da convocatoria da liña de subvencións do Plan Específico de Acción Comunitaria 2017 que convocou a Vicepresidencia e Consellería de Presidencia, Administracións Públicas e Xustiza, da Xunta de Galicia e, que foi publicado no Diario Oficial de Galicia do venres 20 de xaneiro (nº 14).

Este Plan Específico de Acción Comunitaria está destinado a asociacións de veciños, federacións ou unións de asociacións de veciños de Galicia, comunidades de augas debidamente inscritas no rexistro público correspondente e, mailas asociacións de mulleres rurais.

O plan vai dirixido ás seguintes actuacións: obras; investimentos e equipamentos de titularidade veciñal ou de dereito de uso, así como camiños veciñais e traídas de auga veciñais coa finalidade de mellorar a prestación dos servizos de interese veciñal.

O prazo para solicitar estas axudas da Vicepresidencia remata o día 20 de febreiro e pódese solicitar información e asesoramento na propia Axente de Desenvolvemento Local, na primeira pranta da Casa do Concello, na rúa do Carme, 3. As solicitudes deben presentarse por vía telemática, na plataforma de Vicepresidencia.

O importe máximo da axuda concedida é de 12.000 euros, e o prazo para ter rematadas as obras, investimentos ou equipamentos é o do 15 de outubro de 2017.

O ex porteiro camerunés Jaques Songo´o, vai selo padriño de honra da sexta Gala do Deporte do Concello de Negreira, este venres 3 de febreiro, a partir das 21 horas no Auditorio do Centro Sociocultural, na cal vánse entregar os recoñecementos aos mellores deportistas de Negreira no pasado 2016 e mailos galardóns á traxectorias e colaboración co deporte local.

Jacques comezou a súa carreira futbolística profesional no Canon Yaoundé, clube do seu país de orixe, Camerún, de onde sairon outros ilustres xogadores como o tamén porteiro, Thomas N'Kono e, Pierre Wome. No ano 1989 asinou polo Toulouse francés, onde estivo tres anos. En 1992 foise ó Le Mans, onde só permaneceu unha campaña. Ao ano seguinte foi fichado polo FC Metz. Estivo neste equipo ata 1996 cando as súas boas actuacións levárono hacia a Liga Española, ao Real Club Deportivo da Coruña.

Songo´o, mítico cancerbeiro do Dépor que gañou a Liga 1999/2000 estivo cinco anos no Real Club Deportivo da Coruña, onde aparte do referido título de Liga, tamén gañou unha Supercopa de España e mailo trofeo Zamora que distingue ao porteiro menos goleado, concretamente na tempada 1996/1997 cando chegou a Galicia, despois de encaixar 32 goles en 42 partidos xogados. En 2001, Jacques abandonou o Deportivo para regresar ao FC Metz, regresando ao equipo galego na tempada 2003/2004 para retirarse do fútbol profesional. Tamén foi integrante do Dépor de fútbol indoor co que gañou a Liga e maila Copa Indoor 2008.

Como curiosidade, na tempada 1999/2000, anotou un gol ante o Numancia de Soria, o cal suponía o empate do Deportivo, pero que lle foi anulado de forma inxusta por unha falta sobre o porteiro rival, pero que non cometeu e, que houbese supuesto o empate a un gol.

Coa Selección Nacional de Camerún participou en catro Mundiais e gañou a Copa de África en dúas ocasións, aínda sendo suplente de Alioum Boukar. Nos últimos tempos, tamén exerceu de segundo adestrador da selección de Camerún.

Actuacións

A sexta edición da Gala do Deporte conxugará a entrega de recoñecementos con actuacións artísticas como o dúo Duelirium, de acrobacias aéreas, ou do músico local Richo, xunto a exhibicións como a da Escola Municipal de Ximnasia Rítmica baixo a dirección de María Fernández, e que deparará sorpresas que agardan aos asistentes este venres nun evento con entrada de balde ata compretar o aforo dispoñíbel. 

A empresa pública Xestur, vén de publicar un novo concurso de solo empresarial a prezo bonificado que ofertará unha superficie total de 1,4 millóns de metros cadrados. Neste proceso de venda que a Consellería de Infraestructuras e Vivenda propón a comezos de cada ano, no Parque Empresarial de Negreira ofértanse un total de 15.585 metros cadrados, en 8 parcelas e cun prezo por metro cadrado dende 34,50 euros.

Os interesados poderán presentar ofertas de adquisición deste solo ata o día 18 de marzo. Unha vez rematado o concurso de compravenda, as parcelas non adxudicadas poderanse vender directamente, nas mesmas condicións, prezo e bonificación que as fixadas para o concurso.

Aqueles que adquiran parcelas mediante este sistema bonificado, quedan obrigados a construir as súas instalacións e obter licenza de actividade no prazo máximo de tres anos dende a sinatura da escritura de compravenda.

Ademais da adxudicación en compravenda, a empresa Xestur tamén adxudica solo empresarial en dereito de superficie, polo que as empresas adxudicatarias pagan un canon anual moi reducido: 1,5% do prezo da parcela os dous primeiros anos; 2,5% o terceiro e cuarto ano, e o 3,5% a partir do quinto ano. Isto significa que en Galicia haxa solo empresarial dispoñíbel dende 0,38 euros por metro cadrado e ano.

A forza do vento provocou esta pasada madrugada numerosas incidencias no noso concello que están sendo solventadas pola brigada municipal. Xa dende as catro da madrugada, un dispositivo de voluntarios de Protección Civil estivo a traballar arreo en numerosos puntos do concello para a retirada de árbores que obstaculizaban a circulación na rede viaria provincial e municipal.

Dende as oito da mañá, a testemuña collérona os membros da brigada municipal, que coa axuda da empresa encargada do mantemento da rede provincial, retiraron as enormes árbores caídas na estrada provincial DP 5602 de Negreira a Pontenafonso, á altura do lugar de Reibó, na parroquia de Liñaio, unha das máis afectadas pola caída de árbores, incluso sobre o tendido eléctrico.

Nas parroquias de Portor e A Pena, rexistráronse incidencias por mor da caída do fornezo eléctrico desde as catro da madrugada.

Operarios do Concello tamén estiveron a retirar os troncos arrastrados pola crecida do río Barcala, provocando un efecto tapón nas pontes de Cobas e Os Castros.

Asemesmo, houbo de ser retirada unha lona arrincada polo forte vento no campo de fútbol de Cepelo.

Os graves efectos do ciclón Kurt, con ventos furacanados de máis de 100 quilómetros por hora na nosa comarca, deixaron tras de sí, moitos servizos afectados como o subministro de electricidade –nalgún caso como a aldea de Gonte durante máis de 65 horas-, de telefonía móbil, cortes de estradas e desperfectos en cubertas e caída de cascotes que desprendéronse das fachadas, entre outros.

Séguense retirando árbores caídas no parque infantil do Coto, no paseo fluvial, ou na ponte de Cobas, ademáis dunha revisión da rede de estradas municipais, dende as zonas máis altas como Campolongo e Xallas.

Os desperfectos máis importantes de instalacións municipais déronse co derrubo da torre de comunicacións do monte da Pena, desde onde emítese o sinal de Radio Negreira, e mailo sinal de TV para todo o Val de Barcala, polo que até que o mal tempo dé unha tregua e permita facelos traballos correspondentes, as emisións na FM e TDT quedaron interrumpidas, afectando maiormente as da televisión, ás parroquias do concello da Baña.

Máis información AQUÍ.

Asemesmo, o pavillón polideportivo de Pedra Mámoa atópase inutilizado ata que sexa posíbel reparalos danos na súa cuberta. O vento arrincou varias chapas traslucidas do cumio que estánse tratando de sustituir por outras que impidan que a auga da chuvia siga caendo sobre a pista de xogo.

Suspensión de kárate

A climatoloxía adversa obrigou á Federación Española de Kárate e Disciplinas Adaptadas, á suspensión da primeira fase do Departamento de Kárate Infantil que ía celebrarse o pasado sábado no pavillón de Pedra Mámoa, promovida pola Escola Akai Ryu en colaboración co Concello. Por razóns de seguridade, tanto nos desprazamentos de deportistas e familiares coma nas propias instalacións, decidiuse a suspendélo ata novo aviso.

No momento da suspensión, xa estaban en Negreira moitos dos participantes, entre eles, algúns karatecas do País Vasco, Cantabría e Asturies que fixeron noite no hotel Millán para regresar o sábado aos seus lugares de orixe. Outros, como de Cataluña, Aragón ou A Rioxa, xa non viaxaron ou regresaron en pleno camiño de novo cara as súas casas, e a maiores, tamén ían participar karatecas de Portugal, Castela e León, Castela A Mancha ou Baleares. Mesmo os dous técnicos nacionais, Jonatan Huertas e Eduardo Flores, tiveron que regresar no propio voo a Madrid, ante a imposibilidade por razóns de seguridade do avión no que viaxaban de aterrar no aeroporto de Lavacoia, o mesmo venres.

No seguinte enlace atopase a informacíon ampliada da Federación Española de Kárate e Disciplinas Adaptadas: pulsa AQUÍ.

O Concello de Negreira entregou os seus recoñecementos anuais no eido do deporte local, durante a sexta Gala do Deporte celebrada o pasado venres 3 de febreiro, no Auditorio do Centro Sociocultural e, cuxo padriño de honra nesta ocasión foi o ex porteiro do Real Club Deportivo de A Coruña, o camerunés Jacques Songo’o, campión da Liga Española 1999/2000 quen entregoulle ao alcalde, Jorge Tuñas Caamaño, unha camiseta asinada do Dépor.

Foi unha gala cargada de emotividade, sobre todo na súa parte final pola entrega do recoñecemento a título póstumo pola súa colaboración co deporte a Jesús Mancebo Rojo, ciclista finado no mes de setembro nun atropelo mortal en Brandomil, pola súa contribución como membro fundador do club Ciclista Negreira, sendos os seus fillos, Ana e Luis, os encargados de recollelo recoñecemento de mans do alcalde, Jorge Tuñas Caamaño.

Emotiva foi tamén a entrega do recoñecemento especial, a proposta do xurado para esta edición e, por unanimidade, a un veciño de Negreira que, grazas a súa rápida e intervención nun encontro de fútbol, foi quen de salvarlle a vida a un xogador do equipo contrario. Referímonos a Jesús Rey Ferreiro, máis coñecido por Chito, a quen Jorge Valls Pombo, o compañeiro de Boiro a quen Chito axudou naquel fatídico partido, entregoulle este recoñecemento. Ambos fundíronse nun gran aperta, na que sen dúbida, foi a imaxe da gala, perfectamente recollida por Abraham Fotógrafos. Xunto a eles dous, tamén suviron ó escenario os demais compañeiros presentes do Negreira Veteranos e mailo Mobles Guadalupe, entre os cales xurdiu unha amizade difícil de rachar.

A sexta Gala do Deporte comezou coas palabras de benvida do concelleiro de Deportes, Xuventude e Participación Cidadá, José Daniel Casal Leis, para acto seguido entregarse o primeiro ao mellor clube de 2016 ó equipo de veteranos + 45 do club de Tenis Negreira, que no pasado ano conqeuriu o título de campións galegos de veteranos, sendo o seu presidente e capitán do equipo, Jesús Mariño, o encargado de recollelo xunto a outros membros do clube, e que foilles entregado pola concelleira de Servizos Sociais e Educación, María Jesús Veiga Hortas.

O recoñecemento á traxectoria deportiva, recaeu en José Manuel García Estévez, presidente-fundador do club Atletismo Negreira, e un claro exemplo de traballo e esforzó polos demais, e sempre pelexando por introducir aos nenos/as no mundo do atletismo e tratar de enganchalos a este difícil deporte.

O terceiro recoñecemento foi para a mellor deportistas promesa de 2016. Foi para a xove ximnasta Valeria Torreira González, pertencente ó club Ximnasia Rítmica Compostela e que ten unha importante proxección, destacando pola súa madurez e mailo seu afán de superación. Os seus inicios neste deporte foron eiquí, na Escola Municipal de Ximnasia Rítmica.

E o recoñecemento á mellor deportista do 2016 levouso Alba Vázquez Corzón. Con 14 anos, esta karateca da Escola Akai Ryu, acapara todo tipo de eloxios pola súa progresión. En marzo do pasado ano converteuse en subcampiona de España, de kumite xuvenil, nos Campionatos de España celebrados en Murcia, como integrante da Selección Galega de Kárate. Recentemente, tamén foi premiada como mellor deportista na gala da Federación Galega de Kárate.

Cada ano recoñécese a labor dos clubes de Negreira, polo que este ano houbo unha merecida homenaxe ó Akai Ryu, que foi creado no ano 2011 e que participa en infinidade de torneos de ámbito nacional e internacional, e organizando eventos como é a Copa Akai Ryu, ou adestramentos e competicións da Federación Española de Kárate. Carla Rodríguez, adestradora do clube foi a encargada de subir a recollelo recoñecemento de mans do concelleiro de Obras e Urbanismo, Manuel Ángel Leis Míguez.

Actuacións

A Gala do Deporte contou este ano coas actuacións en directo do cantautor Richo, e coas exhibicións a cargo dun dos mellores especialistas de freestyle con balón de España como o vigués Dani Comesaña, ademáis da actuación do grupo de rapazas da Escola Municipal de Ximnasia Rítmica, dirixidas por María Fernández, e dun dos mellores ximnastas de Galicia como é Miguel Fernández. O colofón á gala púxoo a actuación de Raquel Oitavén (Duelirium), coas súas acrobacias áereas.