Este xoves 1 de outubro bota a andar o novo curso académico 2020/2021 coas máximas garantías de seguridade cun exhaustivo protocolo que lle foi entregado ás familias. A Escola Municipal de Música que dirixe Raúl Martín Niñerola, inicia o novo curso con 98 alumnos e alumnas matriculados, ofrecendo a maioría de clases individuais, agás as de Linguaxe musical, Iniciación, música en movemento e coro, así como conxuntos de vento e percusión, cordas, acordeóns e gaitas.

O director, Raúl Martín Niñerola, adiantou ás familias, as medidas e os protocolos que se van a implantar para evitar os posibles contaxios e a propagación da Covid-19.

O Concello de Negreira está a facer unha forte aposta por manter as actividades culturais e deportivas para a veciñanza e no caso da Escola Municipal de Música, se adoptan unha serie de medidas como que o acceso do alumnado farase polo Centro Sociocultural, ata cuxa entrada os pais e nais poderán acompañar aos seus fillos, pero non poderán acceder nin ó edificio nin ás aulas, para garantir que se cumplan todos os protocolos de seguridade. Todos os alumnos deberán acoder con máscara que só poderán quitala cando estén tocando instrumentos, agás os percusionistas, pianistas, violinistas e guitarristas que deberán levala en todo momento.

A Escola Municipal de Música de Negreira elaborou unha circular informativa sobre as entradas e saídas do centro, así como un protocolo a seguir durante o presente curso.

O Servizo de Voluntariado do Concello de Negreira lanza unha campaña de recollida de ordenadores portátiles. Se tes un ordeandor portátil obsoleto ou adquiriches un novo recentemente, doa o antigo para a formación de nenos/as de familias en risco de exclusión social, ou con fins educativos.

Para maior información sobre a campaña ou doar un equipo informático, podes achegarte á oficina do Voluntariado Social, sita na pranta baixa da casa do Concello, na rúa do Carme, 3, ou ben chamando ó número de teléfono: 664 074 674.

Dende o xoves día 1 de outubro, só en horario de tarde, o acceso do público en xeral ás instalacións e locais do Centro Sociocultural e maila Casa da Cultura, farase pola entrada do Centro Sociocultural.

O horario de apertura das instalacións culturais vai continuar sendo de 16:00 a 23:00 horas, pero a entrada farase polo Centro Sociocultural, dentro das novas normas de seguridade establecidas polo Concello de Negreira ante a pandemia da Covid-19.

No caso do alumnado e profesorado da Escola Municipal de Música de Negreira (EMMN), o acceso ás aulas e locais, xa estaba previsto a través do Centro Sociocultural, non podendo acceder os familiares quenes deberán deixar aos alumnos en dita entrada, na cal serán recollidos polo seus profesores.

A Casa da Cultura acolleu hoxe a presentación do Programa de emprego Mocidade 2020, para persoas mozas incluídas no ficheiro do Sistema Nacional de Garantía Xuvenil (SNGX), o cal terá unha vixencia de 12 meses e que comeza a súa andaina dende mañá día 1 de outubro, sendo o Concello de Negreira o seu promotor, coa colaboración dos Concellos da Baña, Santa Comba e Val do Dubra. O proxecto conta cunha achega da Consellería de Economía, Emprego e Industria, da Xunta de Galicia, que ascende a 369.492,32 euros, coa referedida finalidade de formación e aprendizaxe de 16 alumnos/as-traballadores/as.

Esta axuda enmárcase dentro do Programa Operativo de Emprego Xuvenil, Eixe prioritario 5, Prioridade de investimento 8.2, obxectivo específico 8.2.2, estando confinanciado pola Iniciativa de Emprego Xuvenil e o Fondo Social Europeo para o período 2014-2020, nunha porcentaxe do 91,89%.

O Programa de emprego "Mocidade 2020", contará con dúas especialidades formativas: Fábricas de albanelería e Actividades auxiliares en viveiros, xardíns e centros de xardinería.

O acto de presentación contou coa participación do alcalde de Negreira, Manuel Ángel Leis Míguez; o rexedor da Baña, José Antonio Pereira Gil, e mailo alcalde de Santa Comba, David Barbeira. Tamén participaron na presentación, a directora de Mocidade 2020, Alicia Blanco Sande, e maila axente de Desenvolvento Local do Concello de Negreira, Sonia Ponte Esturao.

Unha das actuacións municipais que actualmente están en fase de execución é o proxecto de saneamento e pavimentado da rúa Carballiños, na contorna das Brañas. É unha mellora deseñada polo Concello para paliar os problemas que padece a veciñanza no tocante ás augas pluviais, de cara a súa recollida e posterior conexión coa rede municipal de pluviais, evitando que vaian parar á rede de augas residuais.

O proxecto conta cun investimento de 71.663 euros, está incluido dentro do Plan de Obras e Servizos (POS + 2019), financiado con fondos da Deputación da Coruña.

Unha vez executados os traballos de saneamento que ascenden a 28.243 euros, a empresa adxudicataria procederá o pavimentado final da rúa Carballiños coa aplicación dunha nova capa de rodadura con aglomerado en quente.

O Concello de Negreira acaba de recepcionar un total de 1.750 máscaras, mediante 35 caixas de 50 unidades cada unha, nunha doazón que forma parte da campaña do Goberno de España en colaboración coa Federación Española de Municipios e Provincias (FEMP), para a contención da pandemia da Covid-19, a través do envío xestionado pola Deputación da Coruña.

Esta axuda de material de protección estáse a entregar a tódolos concellos de menos de 20.000 habitantes, cun total de 117.000 unidades, cuxo reparto está fixado en proporción ao número de habitantes de cada municipio.

A prioridade establecida polo Goberno de España e maila FEMP é para o seu reparto entre os colectivos cidadáns máis desfavorecidos, xunto a empregados municipais de servizos como axuda no fogar, ou de limpeza e residuos sólidos.

Ponte Maceira e o Concello de Negreira celebran este xoves 1 de outubro o “Día de Los Pueblos Más Bonitos de España”, coincidindo co aniversario da fundación da Asociación de Los Pueblos Más Bonitos de España. A bandeira da Asociación ondea durante toda a xornada na fachada da Casa do Concello de Negreira, sendo este o primeiro ano que o municipio negreirés forma parte do selecto grupo, tralo acto de proclamación que tivo lugar o pasado 1 de agosto en Ponte Maceira.

O Alcalde de Negreira, Manuel Ángel Leis Míguez, realizou a lectura do manifesto da asociación no salón de plenos do Concello ás 12h, destacando os valores da asociación, a importancia que ten o rural, como é o caso de Ponte Maceira e todo Negreira, así como a necesidade de superar as dificultades da situación que atravesamos neste 2020 traballando xuntos polo ben común.

Segundo a información da que dispón o Concello de Negreira por fontes sanitarias, o municipio leva varias semanas cunha clara incidencia da Covid-19 á baixa logo de terse estabilizado os contaxios superado o ecuador do mes de setembro.

Nos últimos días, a situación mantense cunha baixa incidencia, con menos de 15 casos activos, pese á proximidade e os vínculos sociais cos municipios de Ames e Santiago de Compostela, polo que cómpre seguir extremando as precaucións e lémbrase a importancia de manter as medidas de prevención: uso obrigatorio de máscara; distancia social e hixiene frecuente de mans, de cara a seguir minimizando a propagación da nova enfermidade entre a nosa veciñanza.

Contacontos, concertos, monólogos, unha exposición ou a primeira Noite Romántica, conforman un atractivo e compreto programa do Outono Cultural 2020 que o área de Cultura do Concello de Negreira deseñou para este mes de outubro, recuperando o pulso cultural cunha variada oferta para tódolos públicos.
A destacar concertos como o do grupo De Vacas, este domingo 11 e o venres 9, o concerto didáctico de Abraham Cupeiro; o Ciclo de Monólogos con Víctor Fábregas, o venres 16, e David Amor, o venres 23 súmanse á oferta do mes de outubro. Tamén a primeira Noite romántica, o sábado 17 en sete establecementos de restauración e hostalería.

Programación
Martes 6 - Contacontos infantil con Elefante elegante, con "Lobo bobo". Centro Sociocultural, ás 17:30 horas
Venres 9 - Concerto didáctico con Abraham Cupeiro, con "Resoando no pasado". Auditorio Centro Sociocultural, ás 19:00 horas
Domingo 11 - #Feireando
Teatro musical con Rodarirrodari, ás 11:30 no Campo da Feira
Concerto de De Vacas, ás 12:15 horas na Praza do Concello
Martes 13 - Contacontos infantil con Animar-T, con "A casiña de cartón". Centro Sociocultural, ás 18:00 horas
Venres 16 - Ciclo de Monólogos. Víctor Fábregas presenta "Inmortal". Auditorio Centro Sociocultural ás 21:00 horas. Entrada: 5 €
Sábado 17 - Noite romántica. Locais participantes: Casa Barqueiro, tapería A Esmorga; restaurante Mezquita; restaurante O Rueiro, A Nosa Taberna, cervecería O Cotón e restaurante Casa Néboa.
Do luns 19 ao 16 de novembro - Exposición: "O noso mundo, o noso futuro, a nosa opción". Centro Sociocultural
Martes 20 - Contacontos infantil con Marta Ortiz, con "Canta, Buguina, canta". Centro Sociocultural, ás 18:00 horas
Venres 23 - Ciclo de monólogos. David Amor con "Love está en el aire". Auditorio Centro Sociocultural, ás 21:00 horas. Entrada 5 €
Domingo 25 - #Feireando
"O cego na feira", ás 12:30 horas, no Campo da Feira

Nota
Garantízase as medidas vixentes de hixiene e protección
Prazas limitadas ata completar aforo
Obrigatorio uso de máscara en todas as actividades
As actividades poden sufrir variacións ou anulación por motivos metereolóxicos ou sanitarios

A organización da Carreira Popular de Negreira “A Clásica”, que recae no Concello de Negreira, lamenta ter que comunicar a decisión de cancelar a celebración da proba na súa 41ª edición, prevista para o día 8 de novembro.

Quixemos apurar as opcións para a súa celebración de forma segura para as/os corredoras/es, pero a evolución da situación sanitaria pola Covid-19 e a incerteza do futuro próximo obríganos a renunciar a acoller un evento que reúne máis de 1.500 participantes anualmente.

Facemos este anuncio tristes, pero coa ilusión de que o próximo novembro do 2021 a situación sexa ben diferente e dende hoxe comezamos a traballar para que a 41ª edición de A Clásica sexa coma sempre unha gran festa do deporte e do atletismo en Negreira.

Seguiremos traballando dende xa para celebrar xuntos a vindeira edición nas mellores condicións, esperando que os próximos meses nos deparen un escenario máis certo e seguro do que vivimos agora.

Volveremos con máis ilusión e máis forza e coa certeza de que lle gañaremos ao virus. Tamén queremos mandarlles unha grande aperta e agradecemento ás empresas, colaboradores e a todos os atletas que participaron con nós noutras edicións, especialmente a aqueles que a Covid-19 golpeou máis duramente.