A Deputación da Coruña publicou este mércores 28 de outubro no Boletín Oficial da Provincial (BOP), a resolución pola que aprobouse a concesión definitiva das subvencións correspondentes ao Fondo de financiamento para a reactivación económica e social da provincia da Coruña, PEL-Reactiva. O montante total é de 12,5 millóns de euros que se distribuirán entre os profesionais autónomos/as e microempresas cuxo negocio se vise afectado pola pandemia da Covid-19.

Os concellos tramitarán as axudas

Na primeira semana do mes de novembro, serán os concellos os que pasen a canalizar todas as solicitudes do seu tecido empresarial. Nos cinco días hábiles seguintes á publicación da resolución de asignación de fondos, os concellos deberán remitir a súa convocatoria específica de axudas á Base de Datos Nacional de Subvencións (BDNS), para rexistrala e publicala no Boletín Oficial da Provincia.

O reparto de fondos aos concellos realizase de forma absolutamente obxectiva, baseándose no número de autónomos/as e microempresas de cada municipio. No tocante ao concello de Negreira, o montante total das axudas ascende a 130.210,86 €.

Unha vez que a Base de Datos Nacional de Subvencións publique a convocatoria específica de cada concello no BOP, ábrese prazo para que os autónomos e microempresas poidán solicitar directamente no seu concello as axudas, que se rexistrarán de xeito telemático, a través da Sede Electrónica. A axente de desevolvemento local, Sonia Ponte, será a encargada de supervisar o proceso e resolver calquera dúbida. O prazo para presentar as solicitudes rematará ás 14:00 horas do día 25 de novembro de 2020.

Beneficiarios

Estas axudas da liña PEL-Reactiva poderán solicitalas os autónomos, autónomas e microempresas con domicilio fiscal nalgún dos 88 concellos adheridos ao fondo, que se viran afectadas polo peche do negocio durante o estado de alarma, así coma aquelas que viran reducida a súa facturación en máis dun 75% ou se acolleran a un ERTE como consecuencia da situación de crise sanitaria orixinada pola COVID-19.

As subvencións, compatibles con outras prestacións municipais, oscilarán entre os 1.500 euros para traballadores por conta propia sen traballadores ao seu cargo e, os 3.000 euros aos que poden optar as microempresas e autónomos/as que conten cun cadro de persoal, de entre 6 e 9 traballadores/as.

Os fondos poderán ser destinados, entre outras cuestións, a gastos de adaptación e acondicionamento dos negocios á nova realidade derivada da pandemia como pode ser a compra de mamparas de protección, a adquisición de produtos hixiénicos e de limpeza, material antiséptico ou desinfectante, así como a gastos correntes de subministracións de auga, luz, gas, etc.

O Concello informa que o número de casos activos de Covid-19 en Negreira é a día de hoxe, e segundo datos proporcionados polas autoridades sanitarias, de 5 casos activos, detectados a través das probas PCR que Sanidade está a facer entre a poboación.

Sendo positiva a evolución da situación sanitaria no noso concello, máxime tendo en conta a mala situación na que se atopan os concellos da contorna de Santiago de Compostela, lémbrase á veciñanza a importancia de manter as medidas de protección como evitar o contacto masivo e mailo uso de máscara en todos os ámbitos, con especial chamamento nas xuntanzas de amizades e familiares que lembremos seguen limitadas a grupos dun máximo de cinco persoas non convivintes.

Cómpre lembrar que entre todos e todas debemos apelar á responsabilidade individual para conter o avance do novo virus e así, evitar a súa propagación entre a cidadanía do noso concello.

O Concello de Negreira quere agradecer o bo comportamento da veciñanza e mándavos unha mensaxe de ánimo!

A iluminación LED é a mellor opción, non só porque potencia o aforro enerxético, evitando encarecer a factura pola iluminación das rúas. Tamén porque diminúe a tensión e a contaminación lumínica, mellorando de paso a cantidade de luz nas rúas. Por último, pola súa eficiencia, pola duración da luz ou pola súa contribución respectuosa co medio ambiente, debido aos produtos cos que se fabrica o LED.

O Concello de Negreira está a executar un proxecto de renovación das instalación de iluminación pública exterior para a mellora da eficiencia enerxética en dez rúas da vila:

 - Avenida das Brañas

 - Avenida de Barcala

 - Avenida de Vilachán

 - Rúa da Cachurra

 - Rúa Camiño Vello

 - Rúa de Castelao

 - Rúa Víctor García Ferreiro

 - Rúa do Corzán

 - Rúa do Tambre

 - Rúa Fonte do Carme

Trátase dun proxecto financiado a través do Fondo de Compensación Ambiental, da Consellería de Industria, e cuxo orzamento ascende a 65.000 euros (IVE incluído), distribuidos da seguinte forma:

 - Luminaria LED de 100 watios – 34 unidades

 - Luminaria LED de 40 watios – 115 unidades

 - Punto de luz con columna de 6 metros e brazo – 4 unidades

Ademais, tamén se van mellorar tres cadros eléctricos coa súa correspondente legalización.

Dada a confusión detectada en torno ao que debería ser a correcta xestión das máscaras desbotables, unha vez convertidas en residuos, a Sociedade Galega de Medio Ambiente (Sogama), vén de lanzar unha campaña baixo o título: “Non enmascares a túa responsabilidade: as máscaras desbotables, ao contedor da fracción resto”. Está integrada por un vídeo que explica cómo debe actuar a cidadanía para evitar que os novos residuos derivados da pandemia da Covid-19 (máscaras, toalliñas desbotables, guantes,…), acaben abandonados na contorna natural.

O correcto uso dos elementos de protección individual fronte ao novo virus faise indispensable para evitar, ou alomenos minimizar, a propagación dunha pandemia que, ademais de constituír unha seria ameaza para nosa saúde e economía, alterou substancialmente a nosa forma de vida.

- Tomar conciencia da situación faranos máis cautelosos e precavidos. Debemos protexernos a nós mesmos e axudar á protección dos demais.

- O consumo responsable cobra de novo protagonismo e, como alternativa ás máscaras hixiénicas dun só uso, recoméndase as reutilizables (de especificación UNE 0065), que propician en boa medida a redución de residuos.

 - En caso de optar polas máscaras desbotables, unha vez esgotada a súa vida útil deben depositarse no contedor verde convencional, en bolsa pechada, xunto coa fracción resto (bolsa negra). En Sogama, a parte non reciclable do lixo valorízase enerxeticamente, e con todos os controis ambientais, a temperaturas superiores a 850ºC, permitindo deste xeito a destrución de axentes nocivos. Mesmo percorrido seguen as luvas de usar e tirar, confeccionadas habitualmente con vinilo, vitrilo, polietileno ou látex.

 - As máscaras desbotables constitúen un dos novos residuos hixiénico- sanitarios que acaban abandonados na natureza. A maioría están fabricadas con polipropileno non tecido (un tipo de plástico), polo que o seu negativo impacto na contorna non ofrece dúbida.

 - Unha máscara hixiénica común tarda entre 300 e 400 anos en degradarse no medio natural. E nese intervalo de tempo pode afectar aos ecosistemas de distintas formas.

 - Estar vixiante no correcto uso das máscaras conforme ás instrucións das autoridades competentes en cada momento e xestionalas correctamente unha vez convertidas en refugallos, resulta esencial. Baixo ningún concepto poden arroxarse á vía pública ou ao medio natural, toda vez que constitúen un foco de contaminación.

Pola súa banda, o destino dos envases de xel hidroalcohólico debe ser o contedor amarelo para propiciar a súa separación na planta de clasificación de Sogama e posterior envío ao correspondente centro reciclador.

Imponse o rigor desde a dimensión hixiénica. Completemos a protección co lavado frecuente de mans, evitemos tocarnos a cara e manteñamos a distancia de seguridade con outras persoas.

Xestión das máscaras desbotables from Sogama on Vimeo.

A Corporación Municipal de Negreira celebrará o luns, día 9 de novembro, ás 20:00 horas no Salón de Plenos da Casa do Concello, unha sesión ordinaria do Pleno, conforme á seguinte orde do día:

1º.- Dar conta dos Decretos de Alcaldía emitidos dende o último Pleno Ordinario: do nº 159/2020 ó nº190/2020, ambos inclusive.

2º.- Convenio de colaboración para o desenvolvemento conxunto do transporte metropolitano de Galicia na área de transporte metropolitano de Santiago de Compostela.

3º.- Aprobación inicial, se procede, da modificación orzamentaria número 35/2020.

4º.- Aprobación provisional, se procede, da modificación das tarifas dos servizos municipais de abastecemento de auga potable e depuración de augas residuais.

5º.- Proposta de acordo que formula o Grupo Municipal do PSdeG-PSOE cara a elaboración dun Modelo Eólico Integral.

6º.- Proposta de acordo que formula o Grupo Municipal do PSdeG-PSOE en relación ao sobrecuste que supón para os concellos os gastos de limpeza e desinfección dos Centros Educativos de titularidade autonómica.

7º.- Proposta de acordo que formula o Grupo Municipal do PP en relación á realización de certas actuacións co fin de mellorar o Campo da Feira.

8º.- Proposta de acordo que formula o Grupo Municipal do PP para instar ao Goberno de España a aprobar, urxentemente, unha Lei que garanta o dereito constitucional á propiedade privada e combata eficazmente a ocupación ilegal de vivendas.

9º.- Rogos e preguntas.

O Concello informa que o número de casos activos pola pandemia sanitaria en Negreira é a día de hoxe, e segundo datos proporcionados polas autoridades sanitarias, de 11 casos activos, cun incremento de seis novos contaxios na última semana e polo cal, o noso concello atópase actualmente no nivel de alerta 1 (cor amarela), con entre 7 e 14 casos detectados nos últimos sete días, a través das probas PCR que Sanidade está a facer entre a poboación.

Lémbrase á cidadanía a importancia de manter as distancias de seguridade, a hixiene de mans e mailo uso de máscara en todos os ámbitos, con especial chamamento nas xuntanzas de amizades e familiares, que a Xunta ampliou esta semana a un máximo de seis persoas non conviventes naqueles concellos que coma o noso, non están suxeitos ás novas restricións.

Unha vez máis debemos apelar á responsabilidade individual para conter o avance da nova enfermidade e así, evitar a súa propagación entre a veciñanza do noso concello, sobre todo aquela de maior risco polas súas patoloxías e idade.

Co gallo da conmemoración do próximo 25 de novembro "Día da loita contra a violencia de xénero", a Deputación da Coruña pon en marcha unha campaña online e colaborativa baixo o lema: "De fronte á violencia de xénero", á que poden adherirse entidades públicas e privadas que conta cun programa de actividades online, dirixido a público infantil, xuvenil e adulto, e apela directamente á participación e implicación social. Na web defronte.gal podes seguir a campaña e adherirte a ela, así como na web e nas redes de Facebook, You tube e Twitter da Deputación da Coruña.

Mediante esta campaña procúrase promover a creación dunha rede de administracións locais e entidades sensibles e comprometidas coa igualdade e a erradicación da violencia de xénero, xerando sinerxías entre elas, coa propia Deputación, e co resto da sociedade. Entre os seus obxectivos tamén se encontra a sensibilización social fronte á violencia de xénero, así como fornecer de recursos accesibles ou apoiar a diversificación da oferta de actividades socioculturais relacionadas coa igualdade de xénero.

Programa

Contaremos con tres palestras informativas, un concurso de desafío poético, unha actividade colectiva de papiroflexia e un contacontos.

A partir do día 4 de novembro se ofrecerán online e en aberto tres conferencias que abordarán a violencia de xénero desde diferentes perspectivas, como o da mocidade, da man de Vanessa Rodríguez Pousada, das tecnoloxías da información, con Sara Vierna Fernández, e dos medios de comunicación, con Ana Sanmartín López.

O Desafío poético, é un concurso que se desenvolverá entre o 4 e o 26 de novembro e que consiste en compartir en Facebook ou Twitter un texto poético, propio ou non. O premio serán tres bonos de 60€ para gastar en librarías da provincia.

Entre o 9 e o 15 de novembro desenvolverase unha actividade, guiada por Palmira Castro, de narración poética para todas as idades, conxuntamente cunha acción colectiva de origami nas redes sociais.

Para público infantil e familiar, ofrécese "Contos de nenas grandes e pequenas", unha produción de Marta Ortiz e Brais das Hortas, en aberto do 23 ao 29 de novembro.

Por último, a campaña verase reforzada por oito pequenos vídeos onde diferentes persoeiros da cultura galega recitarán versos contra as violencias machistas.

Lembrade que podedes compartir nas redes a campaña, así como a vosa participación, a través do cancelo #defronte.

O Concello de Negreira inviste 303.194 euros do Plan Único (POS+2019), financiado pola Deputación da Coruña, nun ambicioso proxecto de reurbanización e humanización da praza das Brañas. As obras están en fase de licitación ata o 23 de novembro.

As obras incluirán a construción dunha cuberta de chapa de aceiro para o parque infantil da praza, co obxectivo de protexer das inclemencias meteorolóxicas e da acción do sol aos nenos e nenas que xogan neste espazo.

Dentro das actuacións, tamén se proxecta o axardinamento da área de zonas verdes, coa finalidade de eliminar o terreo de grava existente e dotalo de especies vexetais urbanas coa plantación de árbores coma tilos, tuyas, rododendros e magnolios. Á súa vez, instalaranse tres pérgolas vexetais, céspede, unha fonte recuberta de pedra garnítica e un sistema de rego automático.

Tirolina

Na área norte da praza, colocarase unha tirolina, con solo especial para amortiguar caídas, e pintaranse xogos tradicionais no chan, coma o tres en raia ou a "rayuela". Nesta área tamén se procederá á prantación de árbores.

"As obras suporán unha importante mellora estética e unha aposta pola humanización da praza, que se ubica na zona máis poboada de Negreira", segundo o alcalde, Manuel Ángel Leis Míguez, quen destaca que a cuberta do parque infantil, a creación de zonas verdes e a instalación de novo mobiliario urbano contribuirán a facer un entorno idóneo para o tempo de ocio para a veciñanza.

O Concello da Baña como promotor do Obradoiro de emprego dual “MAIS2020”, xunto cos concellos de Negreira, Santa Comba e Val do Dubra, é beneficiario dunha subvención por parte da Consellería de Emprego e Igualdade para a realización dun obradoiro de emprego para persoas maiores de 18 anos, para 20 alumnos/as traballadores/as, distribuídos nas seguintes especialidades formativas; Limpeza de espazos abertos e instalacións industriais (SEAG0209) con 12 alumnos/as e, de Pintura decorativa en construción (EOCB0110), con 8 alumnos/as.

Este programa de emprego terá unha duración de 9 meses, e a preselección de alumnos/traballadores farase na Oficina de Emprego Santiago Norte, onde serán preseleccionados aquelas persoas inscritas no Servizo Público de Emprego de Galicia como demandantes de emprego; e teñan solicitado algún dos seguintes servizos: Escolas Taller (320), Casa de Oficios (330), Taller de Emprego(340), Outro programas de emprego formación dual (370) e 699 suspensión específica programas experimentais de emprego.

Aquelas persoas interesadas en participar neste programa como alumnado e que aínda non estean inscritas nos devanditos códigos poderán facelo ata o día 24 de novembro de 2020 (incluído), dirixíndose á citada oficina a través das seguintes canles:

- Na oficina, pedindo cita previa no seguinte enlace: https://emprego.xunta.es/citaprevia/

As persoas interesadas en participar no Obradoiro de Emprego “MAIS2020” como persoal directivo, docente ou administrativo de apoio terán que figurar na oficina de emprego solicitando esas ocupacións ou anotarse nas mesmas ata o día 24 de novembro de 2020 (incluido), no enlace: https://emprego.xunta.es/citaprevia/ .

Para máis información sobre este proceso poñánse en contacto coa Oficina de Emprego Santiago Norte.