A Consellaría de Política Social e Igualdade, a través da Dirección Xeral de Maiores e Atención sociosanitaria, organiza este programa de promoción do envellecemento activo e convivencia, destinado ás persoas maiores que se atopen soas nestas datas, xa sexa por carencia de familiares ou amigos, perda do seu cónxuxe ou por outras circunstancias.

Prazas e destinos

Ofértanse un total de 270 prazas distribuídas do seguinte xeito:

• 130 prazas na Residencia de tempo libre do Carballiño (Ourense), para as persoas solicitantes das provincias de A Coruña e Ourense.
• 140 prazas na Residencia de tempo libre de Panxón, en Nigrán (Pontevedra), para as persoas solicitantes das provincias de Pontevedra e Lugo.

No caso de quedar prazas sen adxudicar, valorarase dar media quenda (do 24 de decembro de 2024 ao 30 de decembro de 2024, ou do 31 de decembro de 2024 ao 7 de xaneiro de 2025).

Datas e servizos

Este programa levarase a cabo entre o 24 de decembro de 2024 e o 7 de xaneiro de 2025. No caso de quedar prazas sen adxudicar, valorarase a opción de media quenda.

Máis información

Para máis información, poden dirixirse ao Departamento de Servizos Sociais  do Concello de Negreira

Con motivo do 25 de novembro, iniciamos a programación de actividades organizadas dende o Centro de Información á Muller (C.I.M.), sendo a nosa primeira actuación: “A caravana morada", que este domingo 3 de novembro recala na vila coincidindo coa XVLIII Carreira Internacional de Negreira. 

A caravana do Punto Lila instalarase na entrada do CEIP O Coto, na zona do transporte escolar e terá un horario de apertura de 9.00 a 15.00 horas. A veciñanza recibirá información sobre os recursos dispoñibles para previr a violencia de xénero de man de dúas profesionais especializadas que atenderán a todas aquelas persoas que queiran resolver as súas dúbidas.

A iniciativa está impulsada dende o Centro de información á Muller, dependente do Concello de Negreira. 

Con motivo da XLIII Carreira Internacional “A Clásica” de Negreira, este domingo día 3 de novembro, o Concello informa  á cidadanía e visitantes, dos cortes e restricións pola celebración deste importante evento de trascendencia fóra de Galicia, así como as zonas onde queda prohibido estacionar dende a tarde do sábado 2 de novembro.

A principal recomendación é non intentar acceder con coches ao centro urbano o domingo, a partir das 09:30 horas. Se o fan, eviten as zonas afectadas para non sufrir longas esperas. Para os residentes no centro de Negreira, a recomendación é non usar o coche e se precisan desprazarse por traballo e outras razóns, fágano antes das 09:30 horas.

A qué horas?

O circuito homologado de 5.000 metros para as carreiras de adultos 5K e 10K permanecerá pechado ao tráfico entre as 10:00 e as 13:00 horas.

Zonas afectadas

Con saída da rúa de Castelao –zona Centro de Saúde-, continúa polo instituto Xulián Magariños, rúa Teresa Fabeiro, parte alta da rúa Rosalía de Castro,  avenida das Brañas, estrada AC-444, rotonda de Seilán –só un carril-, Pedra Mámoa, Ponte de Covas, parque empresarial, avenida de Barcala, rúa da Cachurra, rúa do Carme e chegada de novo a rúa de Castelao.

Rúas cortadas

Totalmente cortadas: rúa do Carme, rúa de Castelao e maila contorna do instituto Xulián Magariños, dende primeira hora do domingo.

Prohibido aparcar

Dende a tarde do sábado día 2 de novembro non se pode estacionar na rúa de Castelao, a rúa do Carme, e maila marxe esquerda da rúa da Cachurra e a contorna do IES Xulián Magariños.

Entradas a Negreira

Estarán afectadas polas carreiras 5K e 10K, a partir das 09:45 horas, a entrada dende A Baña e a Variante –rotonda de Ceilán-, a través da avenida das Brañas, e maila avenida de Barcala dende a intersección do parque empresarial de Covas.

Zonas libres

Totalmente libres ao tráfico permanecerán as entradas polas estradas provinciais do Marco do Cornado, Ponte Nafonso e Urdilde –zona do Campo da Feira-, e maila avenida de Santiago. Neste caso, estará prohibido o xiro á dereita de subida pola rúa Fonte do Carme, desde a rotonda da fonte, polo que recoméndase aos condutores non intentar acceder ao centro urbano por esa zona durante a mañá do domingo.

A campaña que agora remata incluiu, ademais da limpeza das marquesiñas, a das áreas recreativas e diferentes berarrúas. A isto, engádese a limpeza de beirarrúas realizada polos distintos obradoiros de emprego.

Os traballos nas marquesiñas e áreas recreativas foron levados a cabo pola brigada municipal de obras e servizos. O obxectivo da iniciativa foi mellorar a imaxe de distintos espazos públicos e conseguir un entorno máis respectuoso coa veciñanza.

A campaña consistiu na limpeza a fondo de maleza, pintadas, retirada de cartaces e lixo, e mellora da imaxe xeral. Establecéronse como prioritarias as marquesiñas pola climatoloxía sufrida nas últimas semanas e en previsión de que continúe o mal tempo de agora en diante.

O Concello de Negreira apela á colaboración da veciñanza para manter estas infraestructuras en boas condicións. Lembra ademais que a limpeza dos espazos públicos é unha responsabilidade compartida entre concello e veciñanza. Hai que destacar ademais que a normativa municipal prohíbe a colocación de cartaces publicitarios en zonas non habilitadas para ese uso.

Segundo o alcalde, Manuel Ángel Leis Míguez  “este tipo de accións reforzan o noso compromiso co entorno e coa atención ás demandas dos nosos veciños e veciñas, sendo importante a colaboración de todos e todas para manter a nosa vila limpa e atractiva”. Estamos para servir e mellorar a calidade de vida en Negreira, di o rexedor, ademais de engadir que “sendo conscientes dos medios dos que dispoñemos e priorizando cada vez que programamos os traballos da brigada municipal”.

No “Día Internacional contra o Cambio Climático”, o Concello de Negreira reafirma o seu compromiso coa sustentabilidade e a loita contra a emerxencia climática, destacando a compostaxe doméstica como unha ferramenta clave para a redución de emisións de CO₂ e a mellora do medio ambiente.

A compostaxe doméstica permite transformar os residuos orgánicos en abono natural, reducindo así a cantidade de lixo que require transporte e tratamento, e minimizando a pegada de carbono asociada a estes procesos. Ademais, axuda a mellorar a saúde dos solos e pechar o ciclo da materia orgánica de forma eficiente e sustentable.

O Concello anima á veciñanza a sumarse á iniciativa ou a continuar co seu compromiso coa compostaxe, aproveitando os composteiros e aireadores que se ofrecen de balde a través do programa de compostaxe doméstica. Aqueles que aínda non participan, poden inscribirse en https://negreira.rsu.gal/ para comezar a contribuír activamente á protección do planeta.

Para máis información:

• Teléfono: 647 521 464
• Email: residuos@concellodenegreira.gal
• Web: https://negreira.rsu.gal/

Este domingo, día 27 de outubro, a vila de Negreira converterase no escenario dunha nova xornada de promoción dos produtos e patrimonio local,a cargo do Grupo de Desevolvemento Local - GDR Terras de Santiago. Esta iniciativa, que promove a riqueza rural, vai ter lugar na praza do Concello, a partir das 12:30 horas.

Baixo o lema "Terras de Santiago: Máis alá de Compostela", a xornada busca dar a coñecer os produtos locais a través da degustación dos mesmos mediante a preparación a cargo do chef, José Manuel Mallón, quen ofrecerá un showcooking.

Esta iniciativa conta co apoio da Xunta de Galicia, o Fondo Europeo Agrícola de Desenvolvemento Rural e outras entidades locais, co obxectivo de poñer en valor a riqueza do noso territorio.

Convidamos a toda a cidadanía a participar e desfrutar dunha xornada de encontro coa gastronomía da nosa comarca.

Data: Domingo, 27 de outubro

Lugar: Praza do Concello

Hora: 12:30 horas

 O programa dual denominado Rexenera 2024 está impulsado polo Concello de Val do Dubra, en colaboración coa Baña, Negreira e Santa Comba, a través de fondos europeos que destina a Xunta.

Botará a andar o próximo 2 de decembro, cunha vintena de prazas para desempregados maiores de 18 anos e en dúas especialidades formativas: Limpeza en espazos abertos e instalacións industriais, con 12 alumnos e, o de Operacións auxiliares en revestimentos continuos en construción, con oito alumnos. 

Este programa de emprego terá unha duración de nove meses e a preselección do alumnado-traballador será a cargo da Oficina de Emprego Santiago Norte.

A data límite para inscribirse é o luns, 28 de outubro, ás dúas da tarde, para veciñanza inscrita como demandantes en servizos como escolas taller, casas de oficio, taller de emprego e outros programas de emprego en formación dual.

Máis información no Servizo Local de Emprego do Concello de Negreira, en horario de mañá (Telf. 881 035 150). 

A Consellaría do Medio Rural activou desde este mércores 16 de outubro, as comunicación e solicitudes para realizar queimas de restos agrícolas por parte de particulares e, tamén de restos forestais amoreados, tanto desde a web habilitada como a través do número de teléfono 012.

A comunicación debe efectuarse sempre con 2 días de antelación á data na que queira facerse a queima. E como é habitual, no portal web para comunicar as queimas de restos agrícolas os cidadáns deben confirmar que se trata dunha «queima correspondente a palla ou material natural, agrícola, non perigoso, utilizado en explotacións agrícolas ou gandeiras».

A maiores, tamén se retoman as solicitudes de autorización para efectuar queimas de restos forestais amoreados. Neste caso, como vén sendo habitual, fai falta contar con autorización administrativa, dado o maior risco da actuación con lume que queira levarse a cabo.

Desde Medio Rural lembran que tanto as comunicacións como as autorizacións deixarán de ter validez nos días que hai vento e altas temperaturas.