O Concello de Negreira deu hoxe o pistoletazo de saída á tempada das escolas deportivas e culturais rexistrando a maior cifra de usuarios e usuarias dende que foron implantadas. Trátase de 730 prazas ocupadas para unha ampla oferta de actividades que alcanza a todas as idades, o que demostra a gran aceptación que seguen tendo as escolas municipais que son unha referencia non só a nivel local, senón tamén a nivel comarcal xa que son moitas as persoas usuarias que proceden de concellos da contorna de Negreira.

A duración das escolas é de sete meses, rematando o 15 de maio de 2023. Cómpre salientar que entre a oferta de escolas deportivas, as disciplinas de pádel, e a de ximnasia de maiores, son dúas das que máis usuarias agrupan. Incluso, a de ximnasia de maiores, que conta con 58 persoas usuarias, houbo de ser ampliada nunha quenda máis, debido á forte demanda de prazas. Tamén destaca a novidade de zumba, de nova implantación e que conta con 42 usuarias no seu primeiro curso.

Entre as actividades culturais; pintura e pandeireta seguen sendo as favoritas entre a nosa veciñanza con máis de 150 nenos e adultos, entre as dúas disciplinas.
Dende o Concello de Negreira salientamos o “éxito” e a “extraordinaria acollida” que seguen tendo as escolas municipais nunha clara aposta pola vida saudable, a práctica deportiva e o fomento das actividades culturais e artes escénicas, tendo en común que a oferta abrangue a todas as idades.

Consulta a listaxe de admitidos:

https://bit.ly/3CdzOKs

O director xeral de Cultura, Anxo M. Lorenzo, participou hoxe en Negreira cando aos alcaldes de Negreira, Manuel Ángel Leis Míguez, e de Padrón, Antonio Fernández Angueira, na presentación do proxecto cultural “Reencontro coa Galicia Medieval”, unha nova proposta que promoverá nos meses de outubro, novembro e decembro, a Galicia medieval a través da música, a arte e distintas actividades divulgativas co apoio da Xunta, e os concellos de Negreira e Padrón, así como Afundación.
A coordinación corre a cargo do catedrático, José Antonio Ponte Far, sendo patrocinado pola Xunta de Galicia, baixo a organización do Grupo Medievalium Gallaecia. As actividades levaranse nos concellos de Negreira, Padrón e Ferrol.

Inclúen unha exposición de pintura medieval do pintor, Pedro Castro Couto; un concerto de música medieval co grupo Medievalium Gallaecia; unha conferencia ilustrada polo catedrático, José A. Ponte Far, baixo o título: Os castelos medievais galegos; e maila presentación da unidade didáctica: A Idade Media en Galicia (S. V-XV), da catedrática, Mª Eva Ocampo Vigo.

Datas:
Negreira: 22 ao 31 de outubro
Padrón: 3 ao 14 de novembro
Ferrol: 3 ao 17 de decembro

O Concello de Negreira promove en colaboración co Centro de Información á Muller (CIM), o I Concurso fotográfico “Día da muller rural de Negreira”, co gallo da celebración, o sábado 15 de outubro do día internacional da muller rural, co que se busca reivindicar o papel da muller, recoñecéndose o seu papel e contribución na promoción do desenvolvemento agrícola e rural, mellora da seguridade alimentaria e a erradicación da pobreza no rural.

O obxectivo é facer partícipes ás persoas para que fagan chegar as súas instantáneas, nas que as mulleres deben ter un papel protagonista. Está dirixido a profesionais e afeccionados á fotografía, residentes en España, e poderedes gañar un vale de 100 € para consumir no comercio local de Negreira.

Envía a túa foto ata o 25 de outubro a: Este enderezo de correo está a ser protexido dos robots de correo lixo. Precisa activar o JavaScript para velo.

A continuación, expóñense as Bases do I Concurso fotográfico “Muller rural” do Concello de Negreira, en adiante, o Concurso.

Datos adxuntos:

Volven os monólogos a programación cultural do Concello de Negreira, con tres citas os venres 21 e 28 de outubro e o 4 de novembro ás 21.00 horas, no Auditorio Afonso Eanes do Cotón.

A primeira cita do Ciclo de Monólogos 2022 chega este venres con Carlos Blanco e o seu espectáculo “Carlos Blanco ao vivo”, cun prezo de 7 euros á entrada. Seguiralle o venres 28 a presenza de Oswaldo Digón, Pepe Capelán e Tito Rober coa obra “3”. 

O colofón ó Ciclo de Monólogos 2022 en Negreira vai a ser a cargo de Pablo Alvite da EMTN de Negreira e o espectáculo “A vida é unha Festa”.   

As entradas para Carlos Blanco estarán á venda o luns 17 de outubro e para as outras dúas obras será de balde ata completar aforo.

Para máis información, no número de teléfono: 981 885 886.

O alcalde do Concello de Negreira, Manuel Ángel Leis Míguez, convocou para o venres, día 21 de outubro de 2022 ás 14:00 horas, no Salón de Plenos da Casa do Concello, unha sesión extraordinaria do Pleno da Corporación Municipal conforme á seguinte orde do día:

 1º.- Conceder o título de Fillo Predilecto do Concello de Negreira, a Don Andrés Barbazán Ferreiro.

 2º.- Conceder o título de Filla Adoptiva do Concello de Negreira, a Dona María del Carmen Álvarez de Ron Riopedre.

 3º.- Conceder o título de Fillo Adoptivo do Concello de Negreira, a Don Amador Rodríguez Troncoso.

 4º.- Conceder o título de Hóspede de Honra do Concello de Negreira, a Don Juan María Arzak Arratibel.

A Mancomunidade de Concellos do Tambre, formada polos concellos de Negreira e A Baña, comunica que, por motivos de forza maior, na presente semana non se efectuará a recollida de residuos sólidos orgánicos na meirande parte das parroquias de ambos municipios.

O servizo prestaráse nos principais núcleos como a vila de Negreira e San Vicenzo, así como nalgunhas zonas próximas ás capitais municipais, debido a que o servizo só dispón dun vehículo para a recollida e atoparse de baixa dous operarios, polo que resulta difícil chegar a todos os núcleos de Negreira e A Baña.

Comunícase que a previsión é que o servizo poida restablecerse con normalidade a partir da vindeira semana.

Desculpen as molestias.

O deputado de Promoción Económica na Deputación da Coruña, Blas García, acompañado do alcalde de Negreira, Manuel Ángel Leis, visitou este xoves dúas obras realizadas por asociacións veciñais con financiamento da Deputación, a través das liñas de subvencións de Promoción Económica.

Coa directiva da Asociación de Veciños O Teleclub de Liñaio, o deputado e o alcalde supervisaron as obras de rehabilitación do muro do adro parroquial de San Martiño, onde contan cun dos locais dos que dispón a entidade, a escola unitaria de Liñaio, fundada por emigrantes da parroquia en Cuba en 1919.

Trátase dun antigo muro de mampostería situado no entorno da casa reitoral que se atopaba en mal estado de conservación e que agora loce completamente renovado grazas a un investimento de 35.000 euros, cofinanciado ao 80% pola Deputación.

Blas García e Manuel Ángel Leis destacaron a notable mellora que experimentou a imaxe do entorno, que continuará sendo mellorado este ano cunha nova subvención de 16.000 euros para a recuperación do hórreo existente na mesma zona, que forma parte do conxunto patrimonial coa igrexa e o cruceiro e que, segundo explicaron os veciños, configura un núcleo de referencia para os lugareños.

Melloras no local social de Xallas

Coa Asociación de Veciños de San Pedro de Xallas, tamén visitaron as obras de mantemento e cambio da cuberta do seu local social, xa que a anterior databa de 1998 e presentaba mal estado e desprendementos.

A cuberta do local foi substituída por unha nova de tella do país. Tamén se procedeu á limpeza a presión, reparación de gretas e pintado da fachada do local da entidade veciñal, que conta con case un centenar de socios e socias.

As melloras supuxeron un investimento de 16.764 euros, dos que a Deputación da Coruña achegou 12.740.

Proxecto cofinanciadas polo Fondo Europeo relativo ao mecanismo de Transformación e Resiliencia da UE no marco do Plan de Recuperación, Transformación e Resiliencia financiado pola UE NExt GenerationEU.

O Concello de Negreira a través do programa “Medramos reciclando”, vén de poñer en marcha un proxecto de compostaxe doméstica para toda a veciñanza, a través do cal, preténdese repartir 130 composteiros domésticos entre a cidadanía interesada, totalmente de balde, co obxectivo de xestionar os restos de comida xerados no noso fogar o convertelos nun ben moi prezado denominado compost.

O goberno local recoméndalle a veciñanza de Negreira que depositen os restos orgánicos xerados no seu fogar nos composteiros domésticos e que só depositen no colector verde a fracción resto. Deste xeito, axudaremos a mellorar a xestión de residuos do concello no seu conxunto. Este programa supón un investimento económico de 15.000 euros.

Por qué se debe compostar os restos orgánicos?

Algo máis da metade dos residuos que xeramos no fogar, arredor dun 60 por cento, están compostos por restos de comida e restos vexetais de poda e de horta. Toda esta materia orgánica pode ser reciclada por nós mesmos/as sen saír de casa e cun mínimo esforzo e tempo pola nosa parte e cos numerosos beneficios dende o punto de vista ambiental, social e económico que isto conleva.

Se o residuo non sae da casa xa non será necesario recollelo nin transportalo ata o punto de xestión, almacenalo e finalmente reciclalo. Aforramos emisións de CO2 do transporte e tratamento e o propio custo de xestionalo. Por outro lado, o produto final que obtemos é un fertilizante natural de excelente calidade con propiedades que melloran o solo e evitando a compra e uso doutros produtos químicos.

Os residuos orgánicos poden ser un grave problema medioambiental se non se xestionan correctamente. A súa descomposición sen control produce lixiviados (líquidos cunha alta concentración de materia orgánica) que contaminan solos, ríos e acuíferos e emiten gases de efecto invernadoiro como metano e dióxido de carbono.

Qué materiais podo compostar?

Pódense botar restos da cociña como froitas e verduras, carne e peixe, pan, legumes e cereais, ovos e cunchas de moluscos, froitos secos, pousos de café e infusións, panos e papel de cociña sen tinturas. Tamén se poden botar restos do xardín e horta como follas, flores, raíces e restos das colleitas, herba e palla, restos de poda triturados, cinza e serraduras de madeira sen aditivos, papel e cartón.

Baixo o slogan: “Negreira recicla. Medramos reciclando”, este programa pretende concienciar á poboación da importancia de xestionar os restos orgánicos para valorizar e obter un fertilizante natural de calidade.

Se queres participar podes facelo chamando ao número de teléfono: 981 885 250 ou mandando un correo ao seguinte enderezo: Este enderezo de correo está a ser protexido dos robots de correo lixo. Precisa activar o JavaScript para velo.

A Asociación de concellos do Camiño de Fisterra e Muxía, na que Negreira ocupa a vicepresidencia, promoveu unha serie de actividades para promocionar o único roteiro oficial cara A Costa da Morte. A primeira, vai ser un ciclo de conferencias no Museo do Pobo Galego que comeza este venres 4 con Manuel Castiñeiras, presidente do Comité Internacional de Expertos do Camiño de Santiago, ás sete da tarde. Por este ciclo pasarán expertos da talla de Antón Pombo, Manuel Vilar ou Francesca Riccio. O resultado das conferencias será unha exposición itinerante que pasará durante o mes de decembro polos concellos integradores da entidade: Ames; Negreira; Dumbría; Cee; Corcubión e Fisterra.

Entre os meses de novembro e decembro, desenvolverase un programa formativo dirixido ao sector hostaleiro e turístico dos concellos que integran a entidade (un curso de calidade e outro de inglés), e estáse estudando outra iniciativa orientada á creación de experiencias turísticas.

O curso de inglés vaise celebrar en Negreira. Dun total de 20 horas de duración, vai selos días: 9, 16, 23 e 30 de novembro, e mailo día 1 de decembro. O outro curso celebrarase en Dumbría, e é de calidade para establecementos turísticos, tamén de 20 horas. Os días: 10, 15 e 24 de novembro, e mailo 14 e 15 de decembro.

Trátase de formación gratuíta e con prazas limitadas, debéndose anotar o persoal interesado antes do venres, día 4 de novembro en: Este enderezo de correo está a ser protexido dos robots de correo lixo. Precisa activar o JavaScript para velo., ou no número de teléfono: 620 399 515.

A asociación celebrará unha xornada de internacionalización dirixida a peregrinos de outras nacionalidades aloxados en Santiago, ademáis de convidar a turoperadores a unha xornada de familiarización sobre o Camiño de Fisterra e Muxía.

Mediante a resolución da Axencia Galega de Infraestructuras, do 20 de outubro de 2022, aprobáronse provisionalmente o Plan de acción contra a contaminación acústica da Rede autonómica de estradas de Galicia e as zonas de servidume acústica dos grandes eixes viarios que se relacionan no seguinte anuncio do Diario Oficial de Galicia (DOG).

https://bit.ly/3fTpdxe

Á zona de Negreira aféctalle a estrada AC-544: Bertamiráns norte (AG-56) - Negreira (AC-447), dende o punto quilométrico 1,13 ao 8,04.

Por isto, e de conformidade co disposto na Lei 37/2003, do 17 de novembro, do ruído, sométense ao trámite de información pública o Plan de acción contra a contaminación acústica na Rede autonómica de estradas de Galicia.

O prazo de información pública é dun mes, contado a partir do día seguinte ao da publicación do anuncio no Diario Oficial de Galicia (o mércores, 9 de novembro de 2022).