A Dirección Xeral de Emerxencias e Interior, da Xunta de Galicia, vén de dictar unha resolución mediante a cal concédelle ao Concello de Negreira, un equipamento consistente nun ¨remolque de emerxencias¨, destinado á Agrupación de Voluntarios de Protección Civil de Negreira, que ve así, reforzado o seu equipamento para a atención en situación de emerxencias.

A Vicepresidencia e Consellería de Presidencia, Admnistracións Públicas e Xustiza, da Xunta de Galicia, fixo pública unha resolución do 13 de novembro pola que resolve a adxudicación, en rexime de concorrencia competitiva, de equipamentos de emerxencias a concellos de menos de 50.000 habitantes, mancomunidades ou agrupacións de concellos, cofinanciados polo Fondo Europeo de Desenvolvemento Rexional no marco do programa operativo Feder Galicia 2014-2020.

O Concello de Negreira promove un acto de recoñecemento á Cooperativa Feiraco, con motivo do seu 50 aniversario, e por toda a súa traxectoria e a súa contribución á veciñanza de Negreira, o cal terá lugar o venres día 30 de novembro, co seguinte programa de actos:

-         Ás 20:30 horas.- Descuberta da figura conmemorativa nos xardíns da avenida de Santiago (fronte a Casa Barqueiro).

-         Ás 21:00 horas.- Acto conmemorativo no Auditorio do Centro Sociocultural.

O Concello de Negreira convida a toda a veciñanza a asistir a este acto de recoñecemento á Cooperativa Feiraco, que deu os seus primeiros pasos un 20 de outubro de 1968 no antigo Casino de Negreira, con arredor de medio cento de persoas que nomearon ao finado, Jesús García Calvo, xurista, rexistrador da Propiedade e intelectual agrarista, como primeiro presidente, e sendo primeiro secretario, Maximino Viaño.

A constitución definitiva de Feiraco como cooperativa non chegaría ata o ano seguinte. Concretamente, o día 6 de xuño de 1969 nunha asemblea celebrada no cine Gran Vía, con aforo suficiente para acoller aos 407 socios fundadores. Unha década despois, a cifra superaba os sete mil socios e a facturación do exercicio económico do ano 1977 alcanzou os 1.164 millóns de pesetas. Despois virían a fábrica de pensos, na Pontemaceira, xa no concello de Ames, mediante un crédito de 12 millóns de pesetas avalado co patrimonio de Jesús García Calvo e Maximino Viaño e, maila posterior industrialización do proceso do leite para o seu envasado e posta á venda no mercado.

Arredor dunhas duascentas persoas, de tódalas idades, desafiaron á choiva o pasado sábado 24 de novembro para camiñar en Negreira como mostra de compromiso na loita contra a violencia de xénero, dentro da sétima Andaina que promove o Centro de Información ás Mulleres (C.I.M.).

Esta camiñada, que foi pioneira nas comarcas de Santiago e, que cumpre sete anos, estivo encabezada polo alcalde, Jorge Tuñas Caamaño e membros da Corporación Municipal como a concelleira de Educación e Servizos Sociais, María Jesús Veiga Hortas, e as concelleiras María José Carballo Villar, do Partido Popular, e María del Carmen Vieites, de Ciudadanos.

Unha vez rematada a andaina polos paseos fluviais ata regresar de novo á vila, entregáronse os premios do VIII Concurso ¨Loita contra a violencia de xénero¨, convocado por este motivo. No apartado de relatos curtos, a gañadora foi Alba Cuns Iglesias, polo seu traballo: Sen aviso. No apartado de cartaces gráficos, o premio foi para un grupo de nenos e nenas baixo o nome de: Xurelos e Sardiñas. En ambos casos, o premio consistiu nun vale agasallo de 100 € canxeable en tendas e comercios de Negreira.

Para rematar a xornada, repartiuse chocolate e rosca entre todos os participantes, trala lectura dun manifesto por parte da moza Alba Cuns Iglesias.

A directora xeral de Administración Local da Xunta de Galicia, Marta Fernández-Tapias, e mailo delegado territorial da Xunta na provincia da Coruña, Ovidio Rodeiro, fixeron entrega esta mañá en Negreira, dun camión cun brazo telescópico e cesta, para os traballos do servizo de mantemento de alumeados públicos dá Mancomunidade de Concellos do Tambre, asistindo os alcaldes de Negreira, Jorge Tuñas Caamaño e, A Baña, Andrés García Cardeso, e mailo primeiro tenente de alcalde negreirés, Manuel Ángel Leis Míguez.

Grazas á achega económica da Xunta en 57.000 euros, a través do Fondo de Compensación Ambiental e na modalidade competitiva para concellos, agrupacións de concellos ou mancomunidades, permítelle á Mancomunidade do Tambre, incorporar un vehículo para garantir a seguridade dos operarios, así como para realizar outros traballos.

O Concello de Negreira informa que tódalas notificacións importantes e urxentes, entre os usuarios e as usuarias das escolas deportivas e mailas escolas culturais municipais, faránse dende agora a través da plataforma de avisos para dispositivos móbiles TokApp School.

Todo o relacionado con incidencias, suspensións de clases, avisos de competicións, ou calquer outro aviso do interese dos usuarios, nais e pais, farase a través de TokApp, unha aplicación totalmente gratuita que se descarga no teléfono móbil ou tableta, accedendo á tenda App Store, Google Play ou Windows Phone Store. Unha vez aberta a aplicación, debes seleccionar o teu país e validar o número de teléfono ou o enderezo electrónico que facilitaches ao Concello de Negreira. Acto seguido, deberás escribir o nome de usuario e introducir o contrasinal que queiras utilizar.

Para calquera dúbida ou consulta sobre TokApp, débese contactar con Sporte Técnico de TokApp School no número de teléfono: 917 372 501.

www.tokappschool.com

A Rede de Dinamización Lingüística falaRedes, da Xunta de Galicia, achégase este primeiro domingo de decembro a nosa vila coa obra: Asubíos, da compañía Elefante Elegante. Esta montaxe vai dirixida ao público infantil, a partir das 13:00 horas no Auditorio do Centro Sociocultural.

Asubíos, é un alegato da compañía Elefante Elegante para unha vida respectuosa do ser humano coa terra que o acolle. Unha peza teatral dirixida a todos os públicos a partir de 3 anos e inspirada no universo literario do escritor mozambicano Mia Couto e no conto popular O flautista de Hamelín, recollido polos irmáns Grimm.

No espectáculo que a compañía do Elefante Elegante crea para a Rede de Dinamización Lingüística, a temática xira arredor do medio natural e de como vivir en harmonía con el. Trátase dun alegato para unha vida respectuosa do ser humano coa terra que o acolle.

Máis información sobre a obra Asubíos.

A Casa do Concello de Negreira acolleu hoxe a sinatura do convenio de colaboración entre a Fundación María Esperanza Rubido Romero, maila Fundación para a Protección de Discapacitados Psíquicos Comarca de Barcala, coa participación do alcalde de Negreira, Jorge Tuñas Caamaño, en calidade de presidente do Padroado da Fundación de Discapacitados Psíquicos Comarca de Barcala; do alcalde da Baña, Andrés García Cardeso, como vicepresidente, e María Jesús Forján Vieito, presidenta do Padroado da Fundación Mª Esperanza Rubido Romero, xunto con María Rosa Tuñas Hortas, directora da Fundación para a Protección de Discapacitados Psíquicos.

A Fundación María Esperanza Rubido Romero concede unha subvención anual de 10.000 euros para levar a cabo o Programa de mellora do benestar persoal e social, entre os usuarios/as da Fundación. Un programa que leva funcionando dende o pasado mes xuño ata o mes de decembro.

Dende a dirección da Fundación para a Protección de Discapacitados Psíquicos Comarca de Barcala, expresan o seu agradecemento á Fundación María Esperanza Rubido Romero, xa que dende o ano 2010 ven axudando coas súas aportacións para levar a cabo os programas de autonomía persoal e de mellora do benestar persoal e social.

Os obxectivos xerais do programa son:

Desenvolver as habilidades emocionais

Mellorar as relación interpersoais

Aumentar a autonomía persoal dos/as usuarios/as da Fundación

As áreas que se traballan no programa son:

Area de vida no fogar Area de educación emocional,

Área de vida na comunidade

Integración na comunidade

Área de formación laboral

O persoal do Centro de Información ás Mulleres (CIM), Rosa Fuentes Cambeiro, directora, e Natalia Suárez García, psicóloga,  impartiron unha charla informativa sobre a violencia de xénero ao alumnado, profesorado e persoal do Obradoiro de emprego Xallas-Barcala-Dubra IV.

Abordáronse contidos como a victimización á que se enfrontan as vítimas de violencia cando deciden rematar coa situación de violencia e, tamén se expuso a violencia de xénero entre adolescentes advertíndolle aos asistentes dos perigos das novas tecnoloxías.

As profesionais do CIM diferenciaron entre sexo e xénero,  considerando que vivimos nunha sociedade patriarcal onde ás mulleres lles veñen impostas determinados roles polo mero feito de nacer muller.

Informaron aos asistentes dos recursos existentes na nosa contorna como é o CIM, que é un recurso de carácter permanente dende o que se artella unha intervención global dirixida ás mulleres que o demanden, así como a calquer persoa, sexa home ou muller, en asuntos relacionados coa promoción social da igualdade de xénero, sendo prioritaria a atención a mulleres en situación de vulnerabilidade e exclusión social.

Tamén informaron de que o Concello de Negreira ten constituida a Mesa Local de Coordinación Interinstitucional contra a violencia de xénero, que é un instrumento operativo no que están representados todos os ámbitos municipais impricados, directa ou indirectamente, na loita contra a violencia de xénero, co obxecto de procurar unha maior eficiencia da resposta ante a vulneración de dereitos que supón a violencia de xénero.

Os obxetivos da mesa son:

-Determinar criterios de detección precoz de casos de violencia de xénero.

-Acordar criterios para a detección e a atención en casos de alto risco.

-Realizar o seguimento de casos de alto risco.

-Identificar a situación de posible descoordinación entre os distintos ámbitos e proposta de mellora.

-Poñer en común e avaliar os datos de violencia de xénero de cada ámbito de actuación.

-Impulsar estratexias de sensibilización e prevención.

-Avaliar os resultados das campañas de sensibilización prevención realizadas.

Dando cumprimento ao disposto no artigo 37.2 do Estatuto dos traballadores, polo que se determinan as festas locais, a Corporación Municipal do Concello de Negreira, en sesión ordinaria do Pleno de data 12 de novembro de 2018, ratificou o decreto de Alcaldía, número 205/2018, de data 17 de outubro de 2018, polo cal establécense as festividades locais de Negreira para o vindeiro ano, determinadas como inhábiles para o traballo, retribuídas e non recuperables, no ámbito do concello.

As datas establecidas son:

- Venres, día 12 de xullo. Festa de San Cristovo

- Luns, día 16 de setembro. Festa de Santa Margarida

Unha vintena de actividades conforman un ambicioso programa cultural e deportivo do Nadal 2018 en Negreira, ao longo de catro semanas, entre o 10 de decembro e mailo 5 de xaneiro de 2019.

Teatro, música, festivais, torneos deportivos, e mailos tradicionais obradoiros DiverNadal, ou a gran Cabalgada de Reis, integran unha programación cultural para tódalas idades, aínda que máis centrada no público infantil.

No mes de decembro, destaca o musical da asociación Aspas: ¡Peter. Volamos! o venres 14, ás nove da noite no Auditorio; ou o fallo do VII Premio de Poesía Xosé M. López Ardeiro, o xoves 20 ás 19.30 horas, coa actuación do Coro Sénior da Universidade de Ferrol; o Gran Festival de Nadal, o sábado 22 ás seis da tarde; e mailo Festival de Nadal da Escola de Teatro, o xoves 27 ás seis da tarde.

I Carreira do Turrón

No eido deportivo, en decembro vánse celebrar o Torneo de Xadrez (domingo 23), de 11 a 13 horas, na Casa da Cultura, e mailo Torneo de Baloncesto Escolar (sábado 29), a partir das nove da mañá, no Pavillón de Pedra Mámoa. O último sábado do 2018 celebrarase ademáis, a primeira Carreira do Turrón -dunha distancia de 4 quilómetros-, con saída ás 16:30 horas dende o CEIP O Coto.

A programación de Nadal estrea o 2019 con teatro. O xoves 3 de xaneiro actuará a compañía Malasombra Teatro, coa súa montaxe: The Fantastic Cleanner´s, ás seis da tarde, no Auditorio.

E o sábado 5 terá lugar a Gran Cabalgada de Reis, que partirá ás 17:00 horas do Campo da Feira, e a recepción á comitiva real dende o balcón da Casa do Concello, unha hora despois, para rematalo percorrido no Pavillón Escolar do Coto, coa entrega de agasallos.

DiverNadal

Os Obradoiros de manualidades para idades infantís terán lugar nas seguintes datas: 22, 24, 26, 27, 28, 29 e 31 de decembro e, o 2, 3 e 4 de xaneiro, no Centro Sociocultural. Hai que anotarse na Delegación de Cultura, en horario de mañá.