Recórdase a toda a veciñanza que seguimos en estado de alarma, e que está prohibido sair á rúa, polo que debemos permanecer confinados nos nosos domicilios, porque tan só se permite abandoar a vivenda en determinados casos.

Non é necesario sair a facer a compra a diario. Pódese e débese realizar para varios días, evitando así que haxa contacto social. Si saen á rúa poden facer todo de unha vez.

Estamos constatando que hai veciños que se pasan o día na rúa facendo os recados, algo que está totalmente prohibido polo que van a ser sancionados.

A denuncia mínima é de 601 euros, cada vez que se sae á rúa sen un motivo urxente, aménd e correr un serio risco de infectarse, polo que a persoa que sae constantemente, vaise a infectar e contaxiar aos fillos, ás parellas e a outros familiares que residen no mesmo fogar.

Por ti, polos teus, por todxs: #QuedaNaCasa

Hai xente que se xoga a vida por ti: #QuedaNaCasa

Propoñémosvos, que cando rematemos con isto, que remataremos máis pronto que tarde, saiamos a celebralo, nos pequenos comercios que hoxe están pechados e angustiados, nunha campaña conxunta da Asociación de Empresarios de Negreira e mailo Concello, baixo o título de: Reciclamos e conectamos.

Saiamos a mercar nas tendas da nosa vila, compremos unhas zapatillas, uns vaqueiros, un billete de lotaría, unhas lentes, algún detalle para o noso fogar que durante moitos días foi o noso refuxio.

Vaiamos a nosa perruqueira ou barbeiro, a facernos un novo corte de pelo, ou ao centro de estética a aplicarnos un tratamento, ou unha masaxe co noso físio que xa botamos de menos.

Saiamos e levemos aos nosos fillos e fillas ao parque, a mercar un libro ou simplemente unhas chuches.

Temos que encher as rúas, os bares e restaurantes, as terrazas... que non se vexan baleiras como estes días, debemos impedir que os autónomos e as pequenas empresas desaparezan.

“Queremos celebrar que finalmente podemos saír, que podemos abrir os nosos negocios, que isto pasou e que podemos seguir adiante.”

Queremos que para cando todo isto pase, a nosa vila transmita alegría e colorido, para iso propoñémosvos ambientala e decorala, con flores, moitas flores de cores, fagamos nosas propias flores con materiais que teñamos a disposición, materiais reciclados e así, lle damos un novo uso, e se tedes nenos na casa sería unha manualidade para facer en familia.

A data exacta non a sabemos, pero temos días para irnos preparando. Animádevos e, sobre todo desfrutádeo! que nos sirva de experiencia para demostrar que xuntos podemos facer cousas grandiosas! E ademais podemos convidar aos nosos familiares e amigos que estiveron traballando durante estes días para agradecerlles o marabilloso traballo e esforzo que realizaron.

#reciclamoseconectamos

Empresarios e veciños de Negreira

Máis información:

https://www.facebook.com/AsociacionEneEmpresariosdeNegreira/

Dende este luns 23 de marzo, na segunda semana de confinamento pola situación de estado de alarma pola expansión do coronavirus, o Concello informa que vai a extender os traballos de desinfección por quendas de operarios, reducindo o risco de contaxios, aos lugares de maior tránsito da vila e, realizándose tanto en horario de mañá como de tarde nos accesos ao centro de saúde, supermercados, panadarías ou farmacias.

Para iso, cóntase con novo material que foi cedido ao Concello como catro equipos sulfatadoras a batería, doados por Comercial Antelo; e tamén, coa doazón de 100 litros de hipoclorito por parte da empresa Xema Galicia, que permitirá facer unha mistura de 50.000 litros con auga, coa particularidade de que os seus efectos de desinfección e hixiéne son por maior tempo. Un técnico de esta empresa acompañará ao persoal municipal para explicarlles como debe realizarse a mistura e maila súa aplicación.

Respecto á renovación do Documento Nacional de Identidade, a visitas do Equipo Móvil de expedición do DNI están suspendidas ata novo aviso.

Así, os DNI que caduquen dende o día 14 de marzo, a data do Decreto do estado de alarma, están prorrogados por un periodo de un ano máis, ata o 13 de marzo de 2021.

Aqueles DNI que estén caducados antes desa data, cando a situación se normalice, deben de renovalos, porque ditos documentos sí están caducados realmente.

Se vos atopades coas tapas dos contedores verdes para o depósito de materia orgánica abertas, non as pechedes.

Desde o Concello de Negreira infórmase que desde hoxe mércores día 25 de marzo, o servizo de recollida de lixo, vainos deixar abertos para evitar o contacto entre os veciños e veciñas coas mesmas e así, previr os posibles contaxios do COVID-19.

O Concello agradece a colaboración da veciñanza con esta medida para evitar que haxa máis contaxios.

Con motivo da situación de emerxencia de saúde pública provocada polo COVID-19, o artigo 6 do Real Decreto 463/2020, do 14 de marzo, polo que se declara o estado de alarma, establece que cada administración conservará as competencias que lle outorga a lexislación vixente na xestión ordinaria dos seus servizos para adoptar as medidas que estime necesarias no marco das ordes directas da autoridade competente para os efectos do estado de alarma

Nese contexto, para a xestión da situación de crise sanitaria ocasionada polo COVID-19, resulta imprescindible ditar instrucións sobre a xestión de residuos domésticos, tanto para o seu manexo domiciliario en fogares con pacientes, como para a súa xestión posterior, así como sobre a xestión dos residuos procedentes de hospitais, ambulancias, centros de saúde, laboratorios, e establecementos similares en contacto con COVID-19

Instruccións

1. En fogares con positivo ou en corentena por COVID-19, as bolsas de fracción resto xeradas, adecuadamente pechadas seguindo as recomendacións do apartado 1 do anexo, depositaranse exclusivamente no contedor de fracción resto ou en calquera outro sistema de recollida de fracción resto establecido na entidade local.

Nos sistemas de recollida húmido-seco, as bolsas depositaranse na fracción que indique a entidade local e dita bolsa recibirá o tratamento indicado no apartado segundo.4.

Queda terminantemente prohibido depositar tales bolsas nos contedores de recollida separada (orgánica, envases, papel, vidro ou téxtil) ou o seu abandono na contorna ou na vía pública.

2. A xestión dos residuos procedentes de fogares sen positivo ou en corentena por COVID-19, continuará realizándose do modo habitual conforme á normativa ordinaria de xestión de residuos, tendo en conta as recomendacións do apartado 2 do anexo.

Pode consultar a Orde SND271/2020, de 19 de marzo, pola que se establecen as instruccións sobre xestión de residuos na crise sanitaria ocasionada polo COVID-19.

https://www.boe.es/eli/es/o/2020/03/19/snd271/con

O Centro de Información ás Mulleres (CIM), lanza a campaña baixo o lema: “Seguimos aquí, por ti”, co obxectivo de informar á veciñanza de que os seus servizos seguen activos, máis ca nunca, nesta difícil situación xerada polo COVID-19, ofrecendo á cidadanía a súa atención psicolóxica e xurídica con normalidade a través de vías telefónica e telemática. Lembran que a atención psicolóxica tamén está dirixida neste caso a aquelas persoas que vivan soas ou que precisen apoio psicolóxico para sobrelevar o confinamento.

Ao longo do período de confinamento, este servizo municipal empregará a súa páxina de Facebook para dar consellos sobre como adultos e rapazada debemos enfrontar a situación de confinamento na que nos atopamos coidando do noso benestar emocional. Desde o departamento de psicoloxía insisten en accións chave como manter os hábitos fisiolóxicos; realizar o teletraballo nunha habitación separada; conversar cos e coas acompañantes de confinamento (no caso de habelos); informarse da situación a través de fontes fiables e limitar a consulta de novas; no caso de estar acompañados reservar algún tempo para un mesmo; facer exercicio; poñerse pequenos obxectivos diarios; enfocarse no que un pode facer no confinamento; e, sobre todo, lembrar que a situación ten un principio e un fin.

En canto aos máis pequenos da casa, desde o CIM recoméndase que as persoas adultas compartan os momentos de estudo que poidan con eles, que escoiten e validen os seus sentimentos (facéndolles ver que é normal sentir medo, angustia, etc.) e enfrentarse aos enfados con tranquilidade e desde o diálogo, evitando o castigo.

As persoas que precisen da axuda poderán contactar a través dos números de teléfono: 662 37 04 48 e 981 88 63 20 e do enderezo electrónico: Este enderezo de correo está a ser protexido dos robots de correo lixo. Precisa activar o JavaScript para velo..

A unidade móbil de doazón de sangue vaise a desprazar a Negreira, este luns, día 6 de abril, en horario de 9:30 a 14:30, e de 16:00 a 21:00 horas, permanecendo estacionada diante do Centro de Saúde.

A Axencia de Doazón de Órganos e Sangue (ADOS), está a impulsar medidas para garantir a continuidade deste servizo esencial, que permite cada día salvar vidas de moitos enfermos ingresados nos hospitais galegos.

O seu traballo depende da colaboración diaria dos concellos galegos e aínda máis nestas circunstancias.

As persoas que acudan a doar sangue, poden amosar a súa tarxeta de doador de sangue para acreditar a o motivo do seu desprazamento ante as autoridades competentes no caso de control de circulación e, posteriormente, na unidade móbil facilitarase a todas as persoas que doen sangue un xustificante da antedita doazón.

Agradecemos a constante colaboración, vital para acadar as doazóns de sangue que se precisan cada día para axudar a milleiros de doentes.

Dende a Policía Local de Negreira queremos ¨agradecer¨ e ¨premiar¨, o comportamento ¨exemplar¨ que están dando os nosos nenos e nenas, verdadeiros héroes ¨anónimos¨, xunto cos nosos sanitarios, en esta terrible pandemia que nos azouta. Son un claro exemplo de responsabilidade e fortaleza, grazas tamén aos seus pais e nais por protexelos; demostrando unha madurez moitas veces impropia da súa idade. Por iso, o futuro con eles e elas, está asegurado e será mellor.

Esta fin de semana, ás 8 da tarde, cando saiades aos balcóns e terrazas a aplaudir e homenaxear ao persoal sanitario, botádelle unha ollada aos vosos fillos e fillas e, dedicádelle un sonoro aplauso tamén a eles. Están dándonos unha gran lección de vida. E cando remate esta situación –máis pronto que tarde-, dende a Policía Local comprometémonos a celebrar unha gran festa con toda a rapazada.

Este sábado e o domingo, estaremos nas rúas da nosa vila, dándovos unha pequena homenaxe máis que merecida: Os aplausos van ser por vós, por ser uns campións e campioas.

Dende a Policía Local de Negreira pedímosvos unha vez máis a colaboración porque só entre todxs, conseguiremos rematar e vencer a esta pandemia do Covid-19 que tanto nos cambiou a vida.

Non sexas irresponsable e poñas en perigo a túa vida e a dos demáis.

#NegreiraQuedaNaCasa

#XuntosVenceremos

#NegreiraSairáDisto